Գերապ. Շեվչուք. Քահանայապետը մտահոգ է Ուքրանիոյ համար ու մօտիկ է բնակչութեան
Ռոպէր Աթթարեան - Վատիկան
Ուքրանիոյ Յոյն Կաթողիկէ Եկեղեցւոյ առաջնորդ Գերերջանիկ Զվիաթոզլաւ Շեվչուք, որ այս օրերուն իր մասնակցութիւնը կը բերէ Վատիկանի մէջ տեղի ունեցող Սիւնհոդոսականութեան նուիրուած սիւնհոդոսին այսօր` Հինգշաբթի 10 Հոկտեմբերի առաւօտեան, առիթը ունեցաւ առանձնական հանդիպում ունենալու Ֆրանչիսկոս Սրբազան Քահանայապետին հետ եւ Ռատիօ Վատիկան – Վատիկան Նիուզի լրագրող Սալվաթորէ Չերնուցիոյի հետ ունեցած հարցազրոյցի մը ընթացքին Ան նշեց, որ ինք ուզեց Սրբազան Քահանայապետը տեղեակ պահել պատերազմի աղէտի իրադարձութիւններու մասին ու նաեւ մարտահրաւէրներուն զոր պէտք է դիմագրաւել ձմեռուայ եղանակին ի տես»։
Հոգեւոր ու խոկումի պահ
«Մեր հանդիպումը եղաւ հոգեւոր, համեմատութեան ու խոկումի պահ մը» ըսաւ ի միջի այլոց Ուքրանիոյ Կաթողիկէ Եկեղեցւոյ առաջնորդը տեղեկացնելով` որ «Սրբազան Պապը իրապէս մտահոգ է Ուքրանիոյ քաղաքացիներուն համար եւ Ուքրանիոյ մէջ տեղի ունեցածին համար մասնաւորապէս աւելիով դիւրաբերներուն համար, որոնք շատ աւելիով կը տառապին»։
Աւագ Արքեպիսկոպոսը բացատրեց նաեւ թէ ինք Քահանայապետին հետ զրոյցին ընթացքին տեղեկութիւններ փոխանցեց Ուքրանիոյ Եկեղեցւոյ կեանքի մասին, ու Եպիսկոպոսներու սիւնհոդոսի մասին որ տեղի ունեցաւ անցեալ Յուլիսին որպէս կեդրոնական նիւթ ունենալով աւետարանութիւնը։
Եկեղեցւոյ հերոսական ծառայութիւնը
«Ֆրանչիսկոս Պապը շնորհակալութիւն յայտնեց ինծի Եկեղեցւոյ մատուցած հերոսական ծառայութեան համար», ըսաւ ի միջի այլոց Գերերջանիկ Զվիաթոզլաւ Շեվչուք Արքեպիսկոպոսը աւելցնելով, որ Նորին Սրբութիւնը ինծի վստահեցուց իր աղօթքները ու իր օրհնութիւնները։
Նախագահ Զելենսքիի այցը Վատիկան
Խօսելով ապա վաղը տեղի ունենալիք Նախագահ Զելենսքիի ու Քահանայապետի միջեւ նախատեսուած հանդիպումի մասին Շեվչուք յայտնեց. «նախագահը կը յարգէ Սրբազան Պապը, որպէս համաշխարհային բարոյական իշխանութիւն ու ձայն» աւելցնելով. «կիսել Ուքրանիոյ ցաւը, վայելել Քահանայապետին ու Սուրբ Աթոռին թիկունքը մեզի համար ունի կենսական նշանակութիւն»։
Կոչ զօրակցութեան
«Փառք Աստուծոյ որ մեր Նախագահը կու գայ մատիկ ընելու Ֆրանչիսկոս Պապին» ըսաւ հուսկ Ուքրանիոյ Յոյն Կաթողիկէ Եկեղեցւոյ առաջնորդ Գերերջանիկ Զվիաթոզլաւ Շեվչուք, ապա կոչ ուղղեց միջազգային հասարակութեան` խնդրելով զօրակցութիւն ու աղօթք ի տես մօտալուտ ձմեռային եղանակին ուր 6 միլիոն ուքրանացիներ օգնութեան կարիքը ունին։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
