Ֆրանչիսկոս Պապ. Մայրուղիներու կանոնները յարգելը կեանքի ներդրում է
Վազգէն Աբարդեան - Վատիկան
Երկուշաբթի, 25 նոյեմբերին, Ֆրանչիսկոս Պապ Վատիկանի մէջ ընդունեց շարժանիւ վարողներու Իտալական համադաշնակցութեան ներկայացուցիչները։
Այս առթիւ արտասանած պատգամին մէջ ողջունելով Իտալական համադաշնակցութեան ներկայացուցիչները, Ֆրանչիսկոս Պապ ընդգծեց անոնց դերը՝ ազգային եւ միջազգային մակարդակով՝ շարժանիւ վարողներուն կառավարումի եւ կարգապահութեան գործին մէջ։
Քահանայապետը ապա կարեւոր համարեց ճանապարհային անվտանգութեան կանոններուն պահպանման վերաբերեալ իրազեկութեան բարձրացումը, մասնաւորապէս երիտասարդներու կրթութեան միջոցաւ, որոնք կը հիանան շարժանիւ վարողներուն ախոյեանութեամբ , բայց յաճախ կ՝անտեսեն վտանգները։
Ֆրանչիսկոս Պապ ապա կ՝անդրադառնայ ճանապարհորդային արկածներու զոհերուն տխուր թիւին, ընդգծելով թէ անվտանգութեան կանոններու իմացութեան պակասը ինչպէս կարող է վտանգի ենթարկել բոլորին կեանքը։
Նորին Սրբութիւնը պատգամը կ՝աւարտէ շնորհակալութիւն յայտնելով համադաշնակցութեան ներկայացուցիչներուն թափած ջանքերու համար ու յաջողութիւն կը մաղթէ անոնց բոլոր գործունէութեան ապա շնորհելով իր առաքելական օրհնութիւնը ինչպէս միշտ կը խնդրէ, որ չմոռնան աղօթելու իրեն համար.
«Աղօթքի կարիքը ունիմ, որովհետեւ իմ աշխատանքս շատ արագացուած է եւ իմ շարժանիւս շատ հին է եւ լաւ չ՝աշխատիր, շնորհակալութիւն», ըսաւ Քահանայապետը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
