Ֆրանչիսկոս Պապ. Դառնանք Աւետարանի ուրախութեան վկաները՝ յոյս եւ մխիթարութիւն պարգեւելով

Վազգէն Աբարդեան - Վատիկան

Հինգշաբթի, 12 դեկտեմբերին, Ֆրանչիսկոս Պապ ընդունեց Santiago de Compostela, Tui-Vigo e Mondoñedo-Ferrol թեմի նորընծայարանի հասարակութիւնը ու անոնց փոխանցեց գրաւոր իր ողջոյնի խօսքը։

Պատգամին մէջ Ֆրանչիսկոս Պապ կ՝ողջունէ Սպանիայէն ժամանած ուխտաւորները, ընդգծելով անոնց հոգեւոր ուղեւորութիւնը, որ զիրենք առաջնորդեց դէպի Հռոմ, հետեւելով Սուրբ Պետրոս առաքեալին հետքերուն։

Ֆրանչիսկոս Պապ ապա կ՝անդրադառնայ di Santiago de Compostela, Tui-Vigo e Mondoñedo-Ferrol թեմերուն միջեւ միջ թեմական նորընծայարանի նոր կազմակերպութեան քաջալերելով նորընծաները, ուժով եւ յոյսով շարունակելու իրենց կազմաւորման ուղեւորութեան մէջ։

Նորին Սրբութիւնը ապա օգտագործելով ուխտաւորին պատկերը կը նկարագրէ նորընծաներուն դէպի քահանայութեան պատրաստութիւնըընդգծելով կոչումի, արկածախնդրութեան եւ վերջին նպատակին կարեւորութիւնը, որ է դառնալ Հովիւներ՝ Քրիստոսի սիրտին համաձայն։

Ֆրանչիսկոս Պապ ապա կը հրաւիրէ մինակ չզգալու ուղեւորութեան ընթացքին եւ թոյլ տալու առաջնորդուելու Աստուծոյ կողմէ ինչպէս նաեւ ըլլալու Աւետարանի ուրախութեան վկաները՝ բոլոր անոնց որոնց կը հանդիպին, շնորհելով քնքշութիւն եւ մխիթարութիւն։

Ֆրանչիսկոս Պապ ապա ակնարկելով 2025 յոբելինական Սուրբ Տարուան կը յորդորէ նորընծաները շարունակելու քալել որպէս յոյսի ուխտաւորներ ու պատգամը կ՝աւարտէ շնորհելով իր առաքելական օրհնութիւնը եւ հայցելով բոլորին վրայ Սուրբ Ճաքոմոյին բարեխօսութիւնը։