Մամպերթի` սրտերը մաքրենք ցոլացնելու հանար Աստուծոյ սէրը եւ անոր ողորմութիւնը
Ռոպէր Աթթարեան - Վատիկան
Երկուշաբթի` 17 Մարտ 2025ի երեկոյեան, Ֆրանչիսկոս Պապին առողջութեան համար Սուրբ Վարդարանի աղօթքը գլխաւորեց Առաքելական Դատարանի Բարձրագոյն Ատեանի Վերատեսուչ` Կարդինալ Տոմինիք Մապերթին եւ աղօթքին սկիզբը Ան վերյիշեց Ֆրանչիսկոս Պապին կիրակի օրուայ Մարեմեան աղօթքին խօսքերը հրաւիրելով «իր հետ միասին փառաբանութիւն մատուցելու Տիրոջ, որ երբեք մեզ չի թողուր եւ որ տառապանքի ժամանակ մեր մօտ կը դնէ մարդիկ, որոնք կը ցոլացնեն իր սիրոյն մէկ շողը։
«Մինչ կը միանանք աղօթքի մէջ Սրբազան Պապին ու Անոր դիտաւորութիւններուն համար, Տիրոջմէ հայցենք, Քառասնորդացի այս ժամանակահատուածին, բիւրեղացնելու մեր սրտերը, որպէսզի կարողանանք ցոլացնել, Անոր սիրոյն ու անոր ողորմութեան շող մը, յատկապէս մեր այն եղբայրներուն համար, որոնք աւելիով կարիքի մէջ են» ըսաւ ապա Կարդինալ Մամպերթին սկիզբ տալով աղօթքին, որուն իրենց մասնակցութիւնը բերին կարդինալներ, եպիսկոպոսներ, կղերական դասի անդամներ, Հռոմի Քուրիայի կրօնաւոր կրօնաւորուհիներ եւ բազմաթիւ հաւատացեալներ, Սուրբ Պետրոսի յաջորդը յանձնելու Սուրբ Կոյս Մարիամի հովանիին։
Ուրախութեան Խորհուրդներու մասին խորհրդածութիւններէն ու վարդարանի տասնեակները աղօթելէն ետքը, արտասանուեցաւ Լիթանիան որմէ ետքը Կարդինալ Մամպերթին հայցեց Սուրն Հոգիին պարգեւները որպէս «օգնութիւն մեր տկարութեան, որովհետեւ, յարատեւելով հաւատքի մէջ, ատինք սիրոյ մէջ ու քալենք միասին, մինչեւ երանելի յոյսի նպատակակէտ»
«Oremus pro Pontifice» Քահանայապետին նուիրուած աղօթքէն ետքը Կարդինալ Մամպերթին ներկաները արձակեց անոնց շնորհելով իր օրհնութիւնները։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
