Քահանայապետին առողջական վիճակը կայուն է թեթեւ բարելաւումներով։ Աղօթող է Միանմարի մէջ երկրաշարժի զոհերուն համար

Ռոպէր Աթթարեան - Վատիկան

Ուրբաթ` 28 Մարտին  կէսօրուայ ժամերուն Սուրբ Աթոռի մամլոյ գրասենեակին մէջ տեղի ունեցած ճեպազրոյցի մը ընթացքին Սուրբ Աթոռի մամլոյ գրասենեակի տնօրէնը նորութիւններ ներկայացուց Ֆրանչիսկոս Սրբազան Քահանայապետի առողջութեան ու ապաքինման գործընթացի մասին դիտել տալով, որ Անոր առողջական վիճակը կը մնայ կայուն թեթեւ բարելաւումներով շնչառական ու շարժիչային ինչպէս նաեւ խօսելու տեսանկիւնէն։ 

Կը շարունակուի թթուածնային բարձր հոսքի նուազումը, ըլլայ օրուան ընթացքին ըլլայ գիշերային ժամերուն։ Արեան քննութիւններուն չափանիշերը կանոնաւոր են։ 

Սրբազան Պապը օրը կ՛անցնէ դարմանական գործընթացքը փոխարինելով հանգիստի ու աշխատանքային գործունէութեան հետ։ Անոր ձեռքերուն կը հասնին բոլոր Վերատսեչութիւններէն թղթածրարներ, թէեւ առ այժմ չկան յատուկ այցելութիւններ։ Քահանայապետը կանոնաւոր կերպով կը հանդիպի հիւանդապահերուն, իր քարտուղարներուն ու ամենամօտ համագործակիցներուն հետ։ 

Այսօր առաւօտեան հետեւեցաւ Քառասնորդացի մտածականին։ Տեղեկանալով  Միանմարի մէջ պատահած աղէտալի երկրաշարժի մասին Սրբազան Քահանայապետը կ՛աղօթէ զոհերուն համար։ Ան ամէն օր կը մասնակցի մատրան մէջ մատուցուած համապատարագին։

Կիրակի օրուայ Մարեմեան աղօթքի խորհրդածութիւնը պիտի հրատարակուի գրաւոր ձեւով, ինչպէս նախորդ կիրակիները։