Քահանայապետին մօտիկութիւնն ու աղօթքը Միանմարի երկրաշարժի զոհերուն ու Քորէայի հրդեհի թիրախներուն
Ռոպէր Աթթարեան - Վատիկան
«Խորապէս վշտացած Հարաւ Արեւելեան Ասիայի մէջ եւ յատուկ կերպով Միանմարի ու Թայլընտի մէջ պատահած Երկրաշարժի հետեւանքով կեանքերու կորուստին ու համատարած աւերածութեան համար, Սրբազան Քահանայապետը իր աղօթքները կը նուիրէ զոհերու հոգւոյն հանգստեան ու իր հոգեւոր մօտիկութիւնը կ՛արտայայտէ բոլոր անոնց. որոնք թիրախ դարձան այս ողբերգութեան։ Սրբազան Պապը կ՛աղօթէ նաեւ շտապ օգնութեամբ զբաղող անձնակազմին համար». Այս կը կարդանք ուրբաթ 28 Մարտին Ֆրանչիսկոս Պապին անունով Կարդինալ Փարոլինի ստորագրութիւնը կրող հեռագիրի մը մէջ ուղղուած Միանմարի եւ Թայլընտի եկեղեցական ու քաղաքական իշխանութիւններուն, ի տես այդ շրջանին մէջ պատահած 7,7 ուժգնութեամբ աւերիչ երկրաշարժին, ոը պատճառեց հազարաւոր մահեր եւ անծայրածիր աւերներ։ Ցնցումները զգացուած են նոյնիսկ Չինաստանի մէջ։
Նոյն օրը հրատարակուեցաւ այլ հեռագիր մը, որ կը կրէ միշտ Կարդինալ Փարոլինի ստորագրութիւնը եւ ուղղուած է այս անգամ Քորէայի իշխանութիւններուն, որով կը յայտնուի «Ֆրանչիսկոս Պապին խոր մտահոգութիւնը ի տես Քորէայի տարբեր վայրերուն մէջ բռնկած հրդեհներուն, որոնք կը սպառնան մարդոց կեանքին ու կը յառաջացնեն վնասներ։
«Մահացածներու հոգիները վստահելով Ամենակալ Աստուծոյ ողորմած սիրոյն, Սրբազան Քահանայապետը իր ցաւակցութիւնները կը փոխանցէ անոնց« որոնք կը սգան իրենց սիրելիները, աղօթք կը նուիրէ վիրաւորներուն ու շտապ օգնութեամբ զբաղողներուն, բոլորին վրայ հայցելով աստուածային մխիթարութեան, ապաքինման եւ ուժի օրհնութիւններ» գրուած է Քորէայի իշխանութիւններուն ուղղուած հեռագիրին մէջ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
