Կարդինալ Պեչչուն կը մասնակցի յառաջիկայ Կարդինալական հաւաքին։

Ռոպէր Աթթարեան - Վատիկան

Յառաջիկայ 27 օգոստոս 2022-ին նախատեսուած` նոր կարդինալներու ստեղծումին Կարդինալական ընդհանուր հաւաքին իր մասնակցութիւնը պիտի բերէ նաեւ Կարդինալ Անճելօ Պեչչուն։ Ան պիտի մասնակցի նաեւ Հռոմի Քուրիայի բարեփոխումներու նիւթին յատկացուած կարդինալներու ժողովներուն։ Լուրը յայտարարեց նոյնինքն Կարդինալ Պեչչուն` Իտալիոյ Սարտենիա կղզիի «Golfo Aranci» շրջանին մէջ անցեալ կիրակի օր մատուցած սուրբ պատարագի ընթացքին յայտնելով, որ Ֆրանչիսկոս Պապը իր հետ հեռաձայնային կապ պահելով զինք հրաւիրած է մասնակցելու վերոնշեալ հաւաքներուն։

Յայտնենք թէ Ծիրանաւորը 2020-ի սեպտեմբեր ամսոյն մէջ հրաժարական ներկայացուցած էր Կարդինալական բոլոր իրաւունքներէն, ի տես իր դէմ յարուցած եւ տակաւին ընթացքի մէջ եղող դատական գործընթացին, կապուած Սուրբ Աթոռի կողմէ Լոնտոնի մէջ շէնքի մը վաճառման խրթին եւ յստակացումներ պահանջող գործողութեան։