Քրիստոնեայ հոգեւոր պետերը կոչ ուղղեցին քրիստոնեայ երեսփոխաններուն Պքերքէի մէջ ձեռնարկելու նախագահական ընտրութեան նախաձեռնութեան մը

Նախագահութեամբ մարոնի համայնքի Պշարա Ռայի պատրիարքին, նախանցեալ երեկոյեան ժամը 5:00-ին Պքերքէի մէջ տեղի ունեցաւ քրիստոնեայ հոգեւոր պետերու հանդիպում մը, որուն իր մասնակցութիւնը բերաւ նաեւ Լիբանանի հայոց թեմի առաջնորդ Շահէ արք. Փանոսեան: Ներկայ էր նաեւ Միացեալ Արաբական Էմիրութեանց, Քաթարի եւ Օմանի թեմի առաջնորդ Մեսրոպ եպս. Սարգիսեան:

Քննարկուեցան Լիբանանը յուզող ներկայ իրադարձութիւնները, սկսեալ` ընկերային եւ տնտեսական կացութենէն, հասնելով մինչեւ քաղաքական ճնշող տագնապը: Հանդիպումէն ետք հրապարակուած հաղորդագրութիւնը կ՛անդրադառնայ քրիստոնեայ հոգեւոր պետերուն մտահոգութեան` երկիրը յուզող ընկերային եւ տնտեսական տագնապին մասին, սննդեղէնի եւ կեանքի տարրական կարիքներու իրենց պէտքերը չկարենալ հոգալու  լիբանանցիներուն դիմագրաւած զրկանքին, լիբանանեան դրամանիշի արձանագրած անկումին, ինչպէս նաեւ անգործութեան համեմատութեան բարձրացումին:

«Նման վտանգաւոր կացութեան մէջ կարելի չէ գոյատեւել», կը նշէ հաղորդագրութիւնը:

Քրիստոնեայ հոգեւոր պետերը պահանջեցին լիբանանեան պետութեան պատասխանատուներէն լուծումներ գտնել այդ տագնապներուն` աւելցնելով, որ կարելի չէ ընդունիլ երկրին պատասխանատուներուն կողմէ անտեսումն ու փտածութիւնը, որովհետեւ անիկա կը մղէ, որ լիբանանցի ընտանիքներ, յատկապէս` նորահաս սերունդը, արտագաղթի դիմեն եւ կամ ուղղուին փողոց` բողոքի ձայն բարձրացնելու եւ իրենց իրաւունքները պահանջելու:

Քրիստոնեայ հոգեւոր պետերուն հրապարակած հաղորդագրութիւնը կը նշէ նաեւ, որ երեք ամիսէ ի վեր նախագահական աթոռը կը մնայ թափուր, որովհետեւ խորհրդարանը կը ձախողի հանրապետութեան նախագահ մը ընտրել:

«Այս իրականութիւնը կտրականապէս մերժելի է եւ երկրին սահմանադրութեան էութեան, ինչպէս նաեւ գերիշխանութեան, անկախութեան եւ լիբանանցիներուն նկատմամբ երեսփոխաններուն ստանձնած պատասխանատուութեան հետ կը հակադրուի: Ոչ ոքի արտօնուած է հայրենիքի ճակատագիրը վտանգի ենթարկել: Լիբանանեան գոյացութեան հիմքն ու անոր զօրութեան իւրայատուկ աղբիւրը իսլամ-քրիստոնեայ ազգային համագործակցութիւնն է, եւ մենք գրեթէ վստահ ենք, որ այս իմաստով իսլամ հոգեւոր պետերը եւս կը զօրակցին մեզի:

«Այս շրջագիծին մէջ քրիստոնեայ հոգեւոր պետերը խորհրդարանէն կը պահանջեն արագացնել ազգային իր պարտականութիւնը եւ ընտրել հանրապետութեան նախագահ մը:

Անոնք Ռայի պատրիարքին կը վստահին, որ իրենց ժողովէն բխած հաղորդագրութեան բովանդակութեան համապատասխան քայլերու ձեռնարկէ եւ քրիստոնեայ երեսփոխանները հրաւիրէ հանդիպումի մը, որ տեղի պիտի ունենայ Պքերքէի մէջ` միասնաբար ձեռնարկելու եւ իսլամ երեսփոխաններու հետ գործակցելու` նախագահական ընտրութեան նախաձեռնութեան մը իրագործման համար», կը նշէ հաղորդագրութիւնը:

Ազգային ազատ հոսանք կուսակցութեան ղեկավար, երեսփոխան Ժըպրան Պասիլ, ակնարկելով քրիստոնեայ հոգեւոր պետերու հանդիպումէն բխած հաղորդագրութեան, յայտնեց, որ անիկա խոստմնալից է նախագահական ընտրութեան տագնապին լուծման գծով դռներ բանալու առումով` ազգային համագործակցութեան եւ հաւասարակշռութեան տարազին հիման վրայ:

Հզօր հանրապետութիւն համախմբումի երեսփոխան Ժորժ Օքէյս անդրադառնալով այդ հրաւէրին հարցազրոյցի մը ընթացքին յայտնեց հետեւեալը. «Ռայի պատրիարքը մեզի չէ կարօտցած, որովհետեւ միշտ կ՛այցելենք իրեն: Երբ մեզի կը յղուի նման հրաւէր մը, կը սերտենք անոր ընդգրկելիք օրակարգը եւ ըստ այնմ կ՛որոշենք, թէ նման հանդիպում մը օգտակար կ՛ըլլա՞յ` սահմանադրական գործընթացներ իրականացնելու: Այլապէս կը մերժենք բարձրանալ Պքերքէ` լուսանկարուելու եւ մեկնելու նպատակով»:

Աղբիւրը՝ Ազդակ