Աւարտուեց Գերագոյն հոգեւոր խորհրդի ժողովը

Փետրուարի 28-ից մարտի 3-ը Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ, տեղի ունեցաւ Գերագոյն հոգեւոր խորհրդի ժողովը: 

ժողովի նիստերն ատենապետեց Արեւմտեան Եւրոպայի Հայրապետական պատուիրակ Տ. Խաժակ արքեպիսկոպոս Պարսամեանը:

Հայաստանում եւ Արցախում 44-օրեայ պատերազմի հետեւանքով ստեղծուած կացութեան եւ առկայ մարտահրաւէրների մասին զեկոյց ներկայացրեց ԳՀԽ անդամ, ի.գ․դ․Գեւորգ Դանիէլեանը: Զեկուցողը, հանգամանօրէն ներկայացնելով Հայաստանում եւ Արցախում ստեղծուած կացութիւնը, անդրադարձ կատարեց երկրի շուրջ ընթացող աշխարհաքաղաքական զարգացումներին, մասնաւորաբար անվտանգային մարտահրաւէրներին: 

Անդրադառնալով Արցախի հիմնախնդրին` ԳՀԽ-ն արձանագրեց, որ Արցախի ժողովրդի անվտանգութեան երաշխիքն Արցախի անկախութեան ճանաչումն է` ելակէտ ունենալով ազգերի ինքնորոշման հիմնարար սկզբունքը: Այս առնչութեամբ  կարեւորուեց համազգային համընդհանուր ջանքերի միաւորումը, միջազգային հանրութեան ամենալայն շրջանակների աջակցութեան ապահովուումը եւ մասնաւորաբար այդ ուղղութեամբ Եկեղեցու կողմից իրականացուող աշխատանքների առաւել ընդլայնումը:

Մայր Աթոռի լուսարարապետ Տ. Մուշեղ եպիսկոպոս Բաբայեանը ժողովականներին տեղեկութիւններ փոխանցեց Մայր Տաճարի հիմնանորոգութեան եւ ամրակայման աշխատանքների վերաբերեալ: Ծանուցուեց, որ բարեյաջող ընթացքի մէջ են Մայր Տաճարի ներքին յարդարման, որմնանկարների վերականգման, օդափոխութեան համակարգի տեղադրման եւ արտաքին բարեկարգման աշխատանքները, որոնց աւարտը նախատեսւում է սոյն թուականի սեպտեմբեր ամսին: 

Ողջունելով կատարուած աշխատանքները` ԳՀԽ-ը գոհունակութեամբ արձանագրեց, որ տեւական դադարից յետոյ Մայր Տաճարն իր դռները կբացի յուրախութիւն եւ ի մխիթարութիւն բարեպաշտ ժողովրդի:

Մայր Տաճարի վերաօծման, Միւռոնօրհնութեան, եպիսկոպոսաց ձեռնադրութեան եւ յարակից միջոցառումների կազմակերպման վերաբերեալ զեկոյցով հանդէս եկաւ Մայր Աթոռի դիւանապետ Տ. Արշակ արքեպիսկոպոս Խաչատրեանը: Սրբազան Հայրը ժողովականներին ներկայացրեց, որ արարողութիւններն ու միջոցառումները հաւուր պատշաճի կազմակերպելու համար ձեւաւորուել են յանձնախմբեր, որոնք կը համակարգեն ծիսական, արարողակարգային, հրատարակչական, քարոզչական եւ տեղեկատուական ոլորտների աշխատանքները: 

Գերագոյն Հոգեւոր Խորհուրդը գոհունակութեամբ ընդունեց ներկայացուած տեղեկութիւնը եւ ծրագրեց Մայր Տաճարի վերաօծման ու Միւռոնօրհնութեան արարողութիւները եւ յարակից  միջոցառումները կազմակերպել ս. թ. սեպտեմբերի 30-ից հոկտեմբերի 3-ն ընկած ժամանակահատուածում, իսկ եպիսկոպոսական ձեռնադրութիւնը` հոկտեմբերի 8-ին:

Մայր Աթոռի Արտաքին յարաբերութիւնների եւ արարողակարգի բաժնի տնօրէն Տ. Նաթան արքեպիսկոպոս Յովհաննիսեանը ժողովականներին ներկայացրեց Սուրբ Ներսէս Շնորհալի Հայրապետի վախճանման 850-րդ տարելիցին նուիրուած տօնակատարութիւնների շրջանականերում նախատեսուած հոգեւոր, կրթական, մշակութային միջոցառումների ծրագիրը: Նշուեց նաեւ, որ առաջիկայ կիրակի` մարտի 5-ին,  Հայաստանեայց Առաքելական Սուրբ Եկեղեցիներում կընթերցուի Սուրբ Ներսէս Շնորհալի Հայրապետի 850-րդ տարելիցին նուիրուած Հայրապետական Կոնդակը:

Նաթան Սրբազանը տեղեկացրեց, որ ի նշանաւորումն Երանաշնորհ Հայրապետի վախճանման 850-րդ տարելիցի` ս. թ. դեկտեմբերին Հայ Առաքելական Սուրբ Եկեղեցին եւ Հռոմի Կաթոլիկ եկեղեցին Վատիկանում կը կազմակերպեն համատեղ միջոցառումներ:  Սրբազան Հայրը նշեց նաեւ, որ Սուրբ Ներսէս Շնորհալու յիշատակի օրը ՅՈՒՆԵՍԿՕ -ն եւս ներառել է յատուկ նշուող տօների շարքում: 

Ժողովականները ծանօթացան նաեւ Մայր Աթոռ Սուրբ Էջմիածնի 2022 թուականի գործունէութեան տեղեկագրին: Արձանագրուեց, որ Մայր Աթոռ Սուրբ Էջմիածնի եկեղեցականների ընդհանուր թիւը 721 է` 49 արքեպիսկոպոս եւ եպիսկոպոս, 72 կուսակրօն քահանայ (ծայրագոյն վարդապետ, վարդապետ եւ աբեղայ), 504 քահանայ, 96 սարկաւագ: Անցնող տարում իրականացուել են տարբեր հոգեւոր-քարոզչական, կրթական, մշակութային ծրագրեր` ՀՀ Զինուած ուժերում, քրէակատարողական հիմնարկներում, կրթական ու մշակութային հաստատութիւններում եւ համայնքներում: 

Կարեւորութեամբ անդրադարձ կատարուեց 2022 թուականի ընթացքում Մայր Աթոռ Սուրբ Էջմիածնի կողմից իրականացուած սոցիալական աջակցութեան եւ օժանդակութեան ծրագրերին: Յիշեալ ծրագրերն ուղղուած են եղել ի նպաստ զոհուած եւ վիրաւոր զինուորների ընտանիքների, պատերազմի հետեւանքով Արցախից եւ սահմանամերձ բնակավայրերից տեղահանուած ու սոցիալապէս ծանր կացութեան մէջ յայտնուած հայորդիների:

Քառօրեայ ժողովի ընթացքում քննարկուեցին նաեւ Եկեղեցու կանոնական ու հովուական կեանքին, կարգապահական ու իրաւական խնդիրներին, կրթական ծրագրերին եւ Եկեղեցու առաքելութեան արդիւնաւորմանը վերաբերող հարցեր: 

Ժողովն ամփոփուեց Ամենայն Հայոց Հայրապետի օրհնութեան եւ գնահատանքի խօսքով:

Աղբիւրը՝ Աերեւլք