Ամենապատիւ Հոգեւոր Տիրոջ այցելութիւնները Դամասկոսի մէջ
Անցեալ Հինգշաբթի` 14 Դեկտեմբեր 2023-ին, Տանն Կիլիկիոյ Կաթողիկէ Հայոց Ն.Ա.Գ.Տ.Տ. Ռաֆայէլ-Պետրոս ԻԱ. Մինասեան Կաթողիկոս-Պատրիարքը հովուապետական այցով ժամանած էր Սուրիայի մայրաքաղաք Դամասկոս, նախագահելու Դամասկոսի Պատրիարքական Թեմին նոր առաջնորդ՝ Արհիապատիւ Գերապայծառ Գէորգ Եպս. Ասատուրեանի գահակալութեան արարողութիւնը։
Երկորդ օրը` 15 Դեկտեմբեր 2023-ին, Տանն Կիլիկիոյ Կաթողիկէ Հայոց Ն.Ա.Գ.Տ.Տ. Ռաֆայէլ-Պետրոս ԻԱ. Մինասեան Կաթողիկոս-Պատրիարքը այցելեց Անտիոքի Յոյն Կաթողիկէ Եկեղեցիին Ամենապատիւ Եուսէֆ Ալ-Ապսի Պատրիարքին, յոյն կաթողիկէ պատրիարքարանին մէջ, ընկերակցութեամբ վարդապետ ու քահանայ հայրերու:
Նոյն օրը առաւօտեան Պապ Թումա, «Թագուհի Տիեզերաց» աթոռանիստ եկեղեցիին մէջ, Տանն Կիլիկիոյ Կաթողիկէ Հայոց Ն.Ա.Գ.Տ.Տ. Ռաֆայէլ-Պետրոս ԻԱ. Մինասեան Կաթողիկոս-Պատրիարքը նախագահեց հանդիսաւոր Ս. Պատարագին, որուն մասնակցեցան հայ կաթողիկէ թեմին առաջնորդ Արհի. Հ. Գէորգ Եպս. Ասատուրեան, վարդապետ ու քահանայ հայրեր: Անոր աւարտին՝ Ամենապատիւ Հոգեւոր Տէրը լանջախաչով պարգեւատրեց ժողովրդապետը՝ Գերապատիւ Հ. Գէորգ Վրդ. Պահէն՝ իր ծառայութեան համար:
Գերերջանիկ Հոգեւոր Տէրը այցելութիւն տուաւ նաեւ Դամասկոսի Հայ Առաքելական Թեմին առաջնորդ Գերշ. Արմաշ Եպս. Նալպանտեանին, եւ այն՝ ընկերակցութեամբ Անտիոքի Յոյն Կաթողիկէ Եկեղեցիին Ամենապատիւ Եուսէֆ Ալ-Ապսի Պատրիարքին:
Աղբիւրը` Հայ Կաթողիկէ Պատրիարքութիւն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
