Հաղարծինի Վանական Համալիրը դարձաւ Ազրպէյճանի կեղծարարութեան թիրախ

Հայքի մշակոյթի օմբուդսմեն (պաշտպան) Յովիկ Աւանեսով 29 Յունուարին ահազանգեց, որ Ատրպէյճան կը շարունակէ պետական մակարդակով տարածքային յաւակնութիւններ դրսեւորել Հայաստանի Հանրապետութեան նկատմամբ՝ օրէ օր խորացնելով բռնագրաւողի իր  քաղաքականութիւնը: Արդարեւ, Տաթեւի  վանական համալիրէն, Էջմիածնի Մայր տաճարէն, Հառիճավանքէն ետք, Ատրպէյճանի կեղծարարութեան թիրախ դարձաւ Հաղարծին վանական համալիրը, որ կը գտնուի Տաւուշի մարզի Դիլիջան քաղաքէն 18 քիլոմեթր հիւսիս՝ Հաղարծին գիւղին մէջ:

«Ադրբեջանական  պետական  քարոզչամեքենան ոչ միայն խեղաթիւրում  է նշանաւոր այս վանական համալիրի պատմութիւնը, այլ նաեւ որպէս «ադրբեջանական պատմական  բնակավայրեր» է ներկայացնում Դիլիջան քաղաքն ու Հաղարծին գիւղը: Այս ամէնը մէկ անգամ եւս ապացուցում է, որ Ադրբեջանը չունի ո՛չ պատմութիւն,  ո՛չ մշակոյթ, այլ իւրացնում է  տարածաշրջանի տեղաբնիկ  ժողովուրդների պատմութիւնն ու մշակոյթը, որոնք  ստեղծուել  են  հազարամեակներ շարունակ: Այն, որ Ադրբեջանում ամէն ինչ կեղծ եւ արհեստական է, դիպուկ  կերպով նշուած է գեներալ-լէյտենանտ Դենիկինինի աշխատութիւնում. «ադրբեջանական հանրապետութիւնում ամէն ինչ արհեստական է», «ոչ իսկական»՝ սկսած անուանումից, որը վերցուած էր Պարսկաստանի նահանգներից մէկից: Արհեստական տարածք, որն ընդգրկում էր Լեզգիական Զաքաթալան, Բաքուի եւ Ելիզաւէտպոլի հայ-թաթարական նահանգները եւ ռուսական Մուղանը՝ միաւորուած թուրքական քաղաքականութեամբ՝ որպէս պանթիւրքիզմի յենակէտ Կովկասում: Արհեստական պետականութիւն, քանի որ այս հողերը, որոնք ընկած էին ժողովուրդների մեծ գաղթի ճանապարհին եւ ենթարկւում էին իրար յաջորդող նուաճողների տարբեր մշակոյթների ազդեցութեանը, միշտ բնակեցուած էին ցրուած փոքրաթիւ ցեղերով, որոնք թշնամանում էին միմեանց դէմ եւ դեռ պահպանում էին քոչուորական կեանքի առանձնայատկութիւնները: Ի վերջոյ, արհեստականօրէն պահպանւում էր նաեւ ադրբեջանական կառավարութիւնը. սկզբում՝ Նուրի փաշայի կամքով, յետոյ՝ գեներալ Թոմսոնի, իսկ հետագայում՝ պարզապէս իներցիայով (բնական մղումով): Վերջերս ադրբեջանական տիկտոկեան ալիքները  հրապարակեցին տեսանիւթեր, որոնցում Հաղարծին վանական համալիրը ներկայացւում է որպէս աղուանական: Այս եւ բազմաթիւ այլ փաստերն ակնյայտօրէն ցոյց են տալիս Ադրբեջանի  հակահայկական քաղաքականութեան դիմագիծը, որն իրականացւում է պետական  մակարդակով», գրած է Աւանեսով:

Աղբիւրը` Ասպարէզ