Եւրոպական Խորհուրդի նախագահ Միշել վաղաժամկէտ պիտի լքէ իր պաշտօնը

Եւրոպական խորհուրդի ղեկավար Շարլ Միշել վաղաժամկէտ պիտի լքէ իր պաշտօնը եւ պիտի մասնակցի Եւրոպական խորհրդարանի ընտրութիւններուն: Եւրոպական խորհուրդի ղեկավարի եւ երեսփոխանի պաշտօնները չեն կրնար համատեղուիլ:

«Ազատութիւն» ձայնասփիւռի կայանը կը հաղորդէ, որ Միշել լրագրողներու հետ զրոյցի ընթացքին նշած է, որ իր յաջորդին անունը կրնայ հրապարակուիլ յունիսի վերջին կամ յուլիսի սկիզբին:

Եւրոպական խորհուրդի նախագահը ընտրութիւններուն պիտի մասնակցի Պելճիքայի «Բարեփոխումներու շարժում» կուսակցութեան ցանկով: Ան այդ կուսակցութիւնը ղեկավարած է 2011-էն 2019:

Միշել իր ներկայ պարտականութիւնները պիտի կատարէ մինչեւ 16 յունիս` Եւրոպական խորհրդարանի երեսփոխանի երդման արարողութիւնը: Եթէ մինչ այդ անոր յաջորդի թեկնածութեան հարցը չլուծուի, ապա Եւրոպական խորհուրդի ղեկավարի պաշտօնակատարը պիտի ըլլայ Հունգարիոյ ներկայացուցիչը, որովհետեւ այդ ժամանակ Հունգարիան պիտի նախագահէ Եւրոպական Միութեան խորհուրդին:

Շարլ Միշել 48 տարեկան է: Ան պելճիքացի է, Եւրոպական խորհուրդի ղեկավարի պաշտօնը ստանձնած է 2019 թուականին` փոխարինելով Տանըլտ Թուսքը: Մինչ այդ, քաղաքական գործիչը վարած է Պելճիքայի վարչապետի պաշտօնը եւ եղած է երկրի կառավարութեան ամէնէն երիտասարդ ղեկավարը:

Միշելի պաշտօնավարման ժամկէտը կ՛աւարտի նոյեմբեր 2024-ին: Եւրոպական խորհրդարանի ընտրութիւնները նշանակուած են յունիսի սկիզբին: Եւրոպական խորհուրդի ղեկավարը կը նշանակուի երկուքուկէս տարիով` նոյն ժամկէտով անոր լիազօրութիւնները երկարաձգելու կարելիութեամբ:

Աղբիւրը՝ Ազդակ