Էջմիածինը կոչ ուղղեց՝ Ատրպէյճանի մէջ գերի պահուող եւ բոլոր գերիներու ազատ արձակման գծով աշխատանք տանելու
Գարեգին Բ. Ամենայն Հայոց կաթողիկոսին նախագահութեամբ՝ Հայաստանի եպիսկոպոսները եւ թեմակալ առաջնորդները հանդէս եկան յայտարարութեամբ մը՝ Արցախի Հանրապետութեան գերի տարուած ռազմաքաղաքական ղեկավարներու հիմնարար իրաւունքներու ոտնահարման դէպքերուն վերաբերեալ:
Ստորեւ՝ այդ յայտարարութիւնը.
«Օրեր առաջ ադրբեջանական քարոզչամեքենան յանցաւոր չարախնդութեամբ եթեր հեռարձակեց Արցախի Հանրապետութեան գերեվարուած ռազմաքաղաքական ղեկավարների հետ պարտադրուած հարցազրոյցների հիման վրայ յօրինուած, առաջիկայ Մարտի 28ին ցուցադրութեան նախատեսուած, այսպէս կոչուած «Անտիտեռոր» վերնագրուած ֆիլմի անոնսը (յայտարարութիւնը):
«Արցախի առեւանգուած ու պատանդառուած ղեկավարների նկատմամբ ցուցաբերուող նման քայլը հերթական անգամ բացայայտում է ադրբեջանական իշխանութիւնների որդեգրած քաղաքականութեան հակահայկական էութիւնը:
«Ամօթալի նմանօրինակ գործողութիւններով ուղղակիօրէն ոտնահարւում եւ անարգւում են միջազգայնօրէն ճանաչուած մարդկային հիմնարար իրաւունքները: Հերթական անգամ փորձ է արւում գերեվարուած անձանց խոցելիութիւնն օգտագործելու անբարոյ գործելաոճի միջոցով ապակողմնորոշել միջազգային հանրութեանը եւ տասնամեակներ շարունակ ադրբեջանական բռնութիւնների ու գոյաբանական սպառնալիքների դէմ արցախահայութեան մղած ինքնորոշման արդարացի պայքարը ներկայացնել որպէս ահաբեկչութիւն:
«Գերեվարուած հայորդիներին նուաստացնող բացայայտ այս գործողութիւնները կրկին ակներեւ են դարձնում խաղաղութեան հասնելու Ադրբեջանի ղեկավարութեան հաւաստիացումների կեղծ ու նենգամիտ բնոյթը:
«Խաղաղութիւնը չի կարող կերտուել հայ ժողովրդի արժանապատուութեան ոտնահարման, ատելութեան ու թշնամանքի շարունակական սերմանման եւ արցախահայութեան արդար իրաւունքների նկատմամբ անյարգալից դրսեւորումների պայմաններում:
«Հայաստանի իշխանութիւնները «Խաղաղութեան դարաշրջան» կերտելու իրենց ձգտումներում առաջնայնօրէն պէտք է հասնեն Ադրբեջանի կողմից նմանօրինակ ագրեսիւ (յարձակողապաշտ) ու թշնամական գործողութիւնների բացառմանը եւ բոլոր հայ գերիների անպայմանաւոր ազատ արձակմանը:
«Կոչ ենք ուղղում միջազգային հանրութեանը, մարդասիրական առաքելութիւն իրականացնող կազմակերպութիւններին` համարժէքօրէն արձագանգել հայ գերիների նկատմամբ Ադրբեջանի դրսեւորած յիշեալ զազրելի գործողութիւններին եւ առաւել գործնական ու ազդու միջոցներ կիրառել հայ գերիների իրաւունքների պաշտպանութեան եւ հայրենիք շուտափոյթ վերադարձի ուղղութեամբ:
«Աղօթում ենք Երկնաւոր Տիրոջը, որ զօրացնի բոլոր նեղեալներին ու գերեալներին` յաղթահարելու համար մարդկային չարիքի ու արհաւիրքի պատճառած զրկանքներն ու տառապանքները:
«Թող Ամենազօր Աստուած օրհնի մեր երկիրն ու ժողովրդին եւ խաղաղութիւն սփռի համայն աշխարհում ու մեր տարածաշրջանում»:
Աղբիւրը՝ Ասպարէզ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
