Ատրպէյճանցիները կը քանդեն Ստեփանակերտի մէջ խորհրդարանի շէնքը

Ատրպէյճանցիները կը քանդեն Ստեփանակերտի Վերածնունդի հրապարակին վրայ գտնուող Արցախի Ազգային ժողովի շէնքը: Այս մասին փաստող տեսանիւթեր տարածուեցաւ ատրպէյճանական «Թելեկրամ»ի ալիքներուն վրայ:

Օրեր առաջ, Արցախի մշակութային ժառանգութեան հսկումով զբաղող Monument Watch անկախ խումբը յայտարարեց, որ Ստեփանակերտի մէջ, ատրպէյճանցիները քանդած են աշխարհահռչակ Շարլ Ազնաւուրի յուշարձանը:

Փորձագէտները բազմաթիւ անգամներ ահազանգեցին Ատրպէյճանի կողմէ Արցախի մէջ հայկական հետքերը վերացնելու մասին: Արցախի մէջ նաեւ եկեղեցիներու խաչերը կը հանուին եւ պատմական կոթողներ կը քանդուին:

Ըստ տարբեր հաշուարկներու` Ատրպէյճանի վերահսկողութեան տակ կը գտնուին 4000-6000 յուշարձաններ, որոնց կարգին՝ եկեղեցիներ, խաչքարեր եւ ամրոցներ:

Աղբիւրը՝ Ասպարէզ