«Հայաստան` 7-13-րդ դարերու հայկական եկեղեցիներուն մէջ որմանկարներ» լուսանկարներու ցուցահանդէս
Ռոպէր Աթթարեան - Վատիկան
Հինգշաբթի 21 Մարտ 2024ի երեկոյեան Հռոմի Վալլիչելիանա գրադարանի մէջ բացումը կատարուեցաւ «Հայաստան` 7-13-րդ դարերու հայկական եկեղեցիներուն մէջ որմանկարներ» խորագիրով լուսանկարներու ցուցահանդէսին, ուր ցուցադրուած են հայկական եկեղեցիներու որմանկարները, որոնք վերջին տարիներուն վերականգնուեցան շնորհիւ ճարտարապետ Արա Զարեանի և Քրիստինէ Լամուրէօյի աշխատանքներուն:
Բացման արարողութեան առիթով նախ ելոյթ ունեցաւ Վալլիչելիանա Գրադարանի տնօրէն Տիկ. Փաոլա Փայեզանօ, որ ծագումով հայ է մօրը կողմէն, ողջունելով ներկաները եւ գնահատելով երկու վերոնշեալ արուեստագէտներու տարած աշխատանքը։
Ապա յանուն Իտալիոյ Հանրապետութեան մօտ ՀՀ դեսպանին` ողջոյնի խօսք ուղղեց Հայաստանի դեսպանութեան դիւանագէտ Մարիեթա Ստեփանեանը, որ շատ կարեւոր նկատեց Արա Զարեանի եւ Քրիսթին Լամուրէօյի աշխատանքը «ոչ միայն վերակենդանացնելու հայկական եկեղեցիներու որմանկարները, այլեւ առաջին հերթին միջազգային հանրութեան ուշադրութիւնը կենտրոնացնելու մշակութային ժառանգութեան պահպանման վրայ, յատկապէս այսօր վտանգի տակ գտնուող Լեռնային Ղարաբաղի տարածքին մէջ» ըսաւ Ստեփանեանը ակնարկելով հայ ժողովուրդի մշակութային ու հոգեւոր մեծ ու դարաւոր ժառանգութեան ու ընդգծելով այդ ժառանգութեան ոչնչացման վտանգի առկայութիւնը։
«Պատերազմը, զոր Ատրպէյճանը սանձազերծեց Լեռնային Ղարաբաղի դէմ 2020 թուականի սեպտեմբերին, գագաթնակէտին հասաւ սեպտեմբերի 19-ին...պատճառելով հարիւրաւոր զոհեր» եւ «իսկական էթնիկ զտում»... «այժմ մեր մտավախութիւնն է գեղարուեստականժառանգութեան անհետացումը» ըսաւ միշտ իր խօսքին մէջ ՀՀ դիւանագէտը հաստատելով, որ «Մենք պէտք է ամէն ինչ ընենք՝ փրկելու 5000 մշակութային վայրերը, որոնց շարքին 370 հայկական եկեղեցիներ, հարիւրաւոր խաչքարեր և այլ յուշարձաններ, տարածքի մը մէջ, որ այժմ զուրկ է իր բնակիչներէ»։
«Այս առումով լուսանկարչական այս ցուցահանդէսը նաև կարևոր կոչ է պահպանելու համար մշակութային և քրիստոնէական ժառանգութիւնը զոր հայերը պարգեւեցին աշխարհին և քաղաքակրթութեան» ըսաւ հուսկ Մարիեթա Ստեփանեանը անգամ մը եւս նորոգելով իր շնորհակալութիւնները Արա Զարեանին և Քրիսթին Լամուրէօյին «հայկական որմանկարչութիւնը կիրքով և արհեստավարժութեամբ տարածելու և զայն ճանաչելի դարձնելու իրենց թանկ ներդրումին համար»։
Խօսք առաւ հուսկ Արա Զարեանը եւ Քրիսթին Լամուրէօն, որ մանրամասն կերպով ներկայացուցին իրենց տարած տասնամեայ աշխատանքը, պաստառի վրայ ցուցադրելով նաեւ որմանկարներու նորոգութեան հանգրուանները եւ իրենց կարգին կարեւոր նկատելով այդ հնագոյն ժառանգութեան պաշտպանութեան ու պահպանումի հրամայականը։
Ցուցահանդէսը բաց պիտի մնայ 20 ապրիլ 2024։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
