Գահիրէի մէջ Կազայի շուրջ բանակցութիւններու նոր փուլ

Երէկ Գահիրէի մէջ ընթացք առաւ Իսրայէլի ու Համասի միջեւ գերիներու փոխանակման եւ Կազայի մէջ զինադադարի հաստատման գործարքի շուրջ համաձայնութիւն գոյացնելու բանակցութիւններու նոր փուլ մը:

Պաղեստինեան Համաս շարժումը շաբաթ օր յայտարարեց. «Խալիլ Հայէի գլխաւորութեամբ պատուիրակութիւն մը վաղը պիտի մեկնի Գահիրէ` ընդառաջելով Եգիպտոսի հրաւէրին: Կառչած կը մնանք 14 մարտին մեր ներկայացուցած կեցուածքին, որ (իսրայէլեան) յարձակումին վերջ տալու բնական պահանջն է եւ անկէ զիջում չկայ»:

Իսրայէլի նախարարաց պատերազմական սեղմ խորհուրդը երէկ որոշեց ընդլայնել իսրայէլեան պատուիրակութեան լիազօրութիւնները եւ պատուիրակութիւնը գործուղել Գահիրէ: Իսրայէլեան լրատուամիջոցներուն համաձայն, պատուիրակութեան ղեկավարներն են արտաքին հետախուզութեան` Մոսատի ղեկավար Տաւիտ Պերնաղը եւ ընդհանուր ապահովութեան ծառայութեան` Շապաքի ղեկավար Ռոնան Պարը:

Գահիրէի բանակցութիւններուն կը մասնակցին նաեւ «Սի.Այ.Էյ.»-ի տնօրէն Ուիլիըմ Պըռնզը, Քաթարի վարչապետ ու արտաքին գործոց նախարար շէյխ Մոհամետ պըն Ապտելռահման Ալ Թանին եւ եգիպտական հետախուզութեան ղեկավարը:

Իսրայէլի վարչապետ Պենիամին Նեթանիահու Իսրայէլի նախարարաց խորհուրդի նիստին սկիզբը յայտարարեց, որ Թել Աւիւ պատրաստ է գերիներու փոխանակում կատարելու, սակայն Համասի ծայրայեղական պայմանները պիտի չգործադրէ: Ըստ անոր, պաղեստինեան շարժումը կը փորձէ Իսրայէլի վրայ միջազգային ճնշումէն օգտուելով շահեր ապահովել: «Ատիկա տեղի պիտի չունենայ», ընդգծեց Նեթանիահու:

Իսրայէլի վարչապետը ըսաւ, որ առանց գերիներու վերադարձին զինադադար պիտի չըլլայ, եւ պնդեց, որ Իսրայէլ յաղթանակէն մէկ քայլ հեռաւորութեան վրայ է, թէեւ անոր վճարած գինը ցաւալի էր:

Նեթանիահու Իրանը ամբաստանեց իր կամակատարներուն ճամբով Իսրայէլի դէմ յարձակումներուն ետին կանգնելու յանցանքով` նշելով, որ իսրայէլեան բանակը Լիբանանի խորքին մէջ սահմանէն 100 եւ աւելի քան 100 քիլոմեթր հեռաւորութեան վրայ գտնուող թիրախներ հարուածած է:

Աղբիւրներ «Արապիա» պատկերասփիւռի կայանին յայտնած են, որ Համաս Գահիրէի մէջ բանակցութիւններուն ընթացքին պահանջած է պաղեստինեան խմբաւորումներու ղեկավարներուն հետապնդումն ու թիրախաւորումը դադրեցնել, ինչպէս նաեւ պահանջած է, որ Իսրայէլ հեռանայ Կազայէն, որպէսզի բանակցութիւններուն աւելի մասնակից դառնայ: Համաս նաեւ բնակիչներու Կազայի հիւսիս առանց նախապայմաններու վերադարձը իբրեւ նախապայման ճշդած է:

Համաս առաջարկած է բանակցութիւններու ընթացքին երկարատեւ զինադուլ հաստատել եւ չառաջարկել կամ չքննարկել պաղեստինեան խմբաւորումներու ղեկավարները Կազայէն աքսորելու հարցը:

Իսրայէլեան բանակի ձայնասփիւռի կայանը հաղորդեց, որ բանակի 98-րդ զօրամասը իր երեք ջոկատներով հեռացած է Խան Եունես շրջանէն` ընդգծելով, որ Կազայի մէջ մնացած է միայն «Նահալ» զօրամասը, որ Կազայի հիւսիսը հարաւէն բաժնող «Նեցարիմ» անցքին մէջ կը գործէ: Իսրայէլեան լրատուամիջոցներ նշեցին, որ 98-րդ զօրամասի Խան Եունեսէն հեռանալը Ռաֆահի գործողութեան պատրաստութեան ծիրին մէջ է: «Ետիոթ Ահրոնոթ» իր կարգին նշեց, որ Խան Եունեսէն հեռացումը կապ չունի Իսրայէլի վրայ ամերիկեան ճնշումներուն հետ, իսկ անոր նպատակը գաղթականներուն Ռաֆահէն հեռանալու վայրեր տրամադրելն է:

Բրիտանիոյ արտաքին գործոց նախարար Տէյվիտ Քամերոն «Սանտէյ Թայմզ»-ին յայտնեց, որ Բրիտանիոյ Իսրայէլին աջակցութիւնը առանց պայմաններու չէ` «Միջազգային կեդրոնական խոհանոց»-ի աշխատակիցներու մահը նկատելով «ողբերգական եւ որմէ կարելի էր խուսափիլ»:

Քամերոն զգուշացուց, որ Բրիտանիան հաշուետուութեան պիտի ենթարկէ Իսրայէլը այդ յարձակումին պատճառով 3 բրիտանացիներու սպանութեան համար: Ան, սակայն, մերժեց խօսիլ այդ յարձակումէն ետք Իսրայէլի զէնքերու արտածումները առկախելու մասին հետզհետէ աւելցող պահանջներուն մասին, նաեւ մերժեց այն պնդումները, թէ բրիտանական կառավարութիւնը կը նուազեցնէ միջադէպին կարեւորութիւնը` Իսրայէլի զայրոյթը յառաջացնելէ խուսափելու համար:

Աղբիւրը` Ազդակ