Հայաստանն ու Ազրպէյճանը 1976 թուականի քարտէսի հիմամբ համաձայնած են սահմանագիծի հատուածներու արձանագրութեան շուրջ
15 մայիսին հանդիպում ունեցած են Հայաստանի եւ Ազրպէյճանի սահմանազատման եւ սահմանային անվտանգութեան հարցերով յանձնախումբերը, արձանագրութիւն ստորագրուած է: Այս մասին կը հաղորդէ Հայաստանի Հանրապետութեան արտաքին գործոց նախարարութիւնը:
Փոխվարչապետներ Մհեր Գրիգորեանի եւ Շահին Մուսթաֆայեւի նախագահութեամբ հանդիպումի ընթացքին յանձնախումբերը, նախորդ` 19 ապրիլի հանդիպումի արձանագրութեան համաձայն, քննարկած են կատարուած աշխատանքները եւ Խորհրդային Միութեան զինեալ ուժերու սպայակոյտի 1976 թուականի տեղագրական քարտէսի համաձայն, համաձայնած անմիջականօրէն Բաղանիս (Հայաստան)-Բաղանիս Այրում(Ազրպէյճան), Ոսկեպար (Հ)-Աշաղը Ասքիփարա(Ա), Կիրանց (Հ)-Խէյրումլի (Ա) եւ Բերքաբեր (Հ)-Կըզըլ Հաճիլի (Ա) բնակավայրերուն միջեւ սահմանագիծի հատուածներու միացեալ կազմուած արձանագրութիւն-նկարագրութիւնը` Խորհրդային Միութեան փլուզման պահու դրութեամբ գոյութիւն ունեցող իրաւաբանօրէն հիմնաւորուած միջհանրապետական սահմանին համապատասխանեցնելու նպատակով:
Կը նշուի, որ կողմերը համաձայնած են աշխատանքային կարգով համաձայնիլ յաջորդ հանդիպման թուականին եւ վայրին շուրջ:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
