Ռուսիա միջուկային զօրավարժութիւններ պիտի իրականացնէ ի պատասխան՝ Արեւմուտքի սպառնալիքներուն
Ռուսիոյ Զինուած ուժերու Գլխաւոր շտաբը, նախագահ Վլատիմիր Փութինի կարգադրութեամբ, սկսած է յառաջիկային Հարաւային ռազմական օկրուգի եւ ռազմածովային ուժերու հրթիռային կազմաւորումներու զօրավարժութիւններու նախապատրաստական աշխատանքները, յայտնած է Ռուսիոյ պաշտպանութեան նախարարութիւնը։
Զօրավարժութիւններու ընթացքին կը նախատեսուի, ի թիւս այլնի, մշակել «ոչ ռազմավարական միջուկային զէնքի կիրառման հարցեր»։ Զօրավարժութիւնները պիտի կայանան՝ ի պատասխան «արեւմտեան պաշտօնեաներու սադրիչ յայտարարութիւններու եւ սպառնալիքներու»։
Նշենք, որ այսօր՝ մայիս 6-ին, ԱՄՆ Քոնկրեսի Ներկայացուցիչներու պալատի դեմոկրատական փոքրամասնութեան առաջնորդ Հաքիմ Ճեֆրիսը յայտարարած է, որ ռուս-ուքրանական հակամարտութեան կրնայ միջամտութիւն պահանջուիլ, եւ չի բացառուիր ամերիկեան զօրքերու ուղարկումն Ուքրանիա։
Աղբիւրը` Արեւելք
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
