Պաշտօնական Երեւանը կը ցաւակցի Իրանեան նախագահական ուղղաթիռի արկածին առիթով

Հայաստանի արտաքին գործոց նախարար Արարատ Միրզոյեանը ցաւակցութիւն յայտնած է ուղղաթիռի արկածի հետեւանքով Իրանի Իսլամական Հանրապետութեան նախագահ Իպրահիմ Ռայիսիի եւ արտաքին գործոց նախարար Հիւսէյն Էմիր Ապտոլլահեանի զոհուելուն առնչութեամբ:

«Տեղեկանալով Իրանէն եկող սարսափելի լուրերուն մասին, որոնց շարքին իմ սիրելի գործընկերոջ եւ ընկերոջ` Հիւսէյն Էմիր Ապտոլլահեանի ողբերգական մահուան մասին` իմ խորին ցաւակցութիւնս կը յայտնեմ Իրանի կառավարութեան, արտաքին գործոց նախարարութեան գործընկերներուն եւ բարեկամ ժողովուրդին: Կիսելով վիշտը` մենք ձեզի ուժ կը մաղթենք այս մռայլ ժամանակներուն մէջ», «Արմէնփրես»-ի հաղորդումով` նշած է Միրզոյեանը «Էքս»-ի մէջ իր կատարած գրառումին մէջ:

Իրանեան նախագահական ուղղաթիռի ողբերգական արկածին առիթով երէկ առանձին ցաւակցագիրներ յղած էին նաեւ Հայաստանի Հանրապետութեան նախագահ Վահագն Խաչատուրեան, վարչապետ Նիկոլ Փաշինեան, Անվտանգութեան խորհուրդի քարտուղար Արմէն Գրիգորեան եւ բազմաթիւ նախարարութիւններու ղեկավարներ: Իրանի պետութեան եւ ժողովուրդին ցաւակցած էր նաեւ Ամենայն հայոց Գարեգին Բ. կաթողիկոս:

Աղբիւրը՝ Ազդակ