Եւրոպական խորհրդարանի ընտրութիւններէն ետք. Ֆոն Տեր Լեյեն. «Վստահ եմ Եւրոպական յանձնաժողովի նախագահի պաշտօնին վրայ նոր նստաշրջան ապահովելու կարողութենէս»

Եւրոպական յանձնաժողովի գործող նախարար Ուրսուլա Ֆոն Տեր Լեյեն յայտարարեց, որ վստահ է յանձնաժողովի իբրեւ նախագահ նոր նստաշրջան ապահովելու իր կարողութենէն:

Ըստ նախնական տուեալներու, անոր կեդրոն աջ Եւրոպական ժողովուրդի կուսակցութիւնը Եւրոպական խորհրդարանի ընտրութիւններուն մէջ աթոռներու մեծամասնութիւնը ապահոված է:

«Այո՛, ես վստահ եմ, սակայն անշուշտ գիտեմ, որ ինծի շատ աշխատանք կը սպասէ: Սակայն ամբողջովին վստահ եմ, ինչ կը վերաբերի երկրորդ նստաշրջանի թեկնածութեանս», աւելցուց ֆոն տեր Լեյեն:

Կեդրոն աջ Եւրոպական ժողովուրդի կուսակցութիւնը, ընկերվարականները, ժողովրդավարները եւ կեդրոնամէտներէ ու ազատականներէ կազմուած «Եւրոպայի վերածնունդ»-ը միասնաբար ապահովեցին Եւրոպական խորհրդարանի աթոռներուն մեծամասնութիւնը, հակառակ ծայրայեղ աջակողմեան ուժերուն արձանագրած մեծ յառաջընթացին:

Կը նախատեսուի, որ Եւրոպական ժողովուրդի կուսակցութիւնը ապահովէ 181 աթոռ, ընկերվարականներն ու ժողովրդավարները` 135 աթոռ, իսկ «Եւրոպայի վերածնունդ»-ը` 82 աթոռ: Նշեալ կուսակցութիւնները կը կազմեն «Մեծ համախմբումը», որուն միջոցով տեղի պիտի ունենան Եւրոպական խորհրդարանին մէջ դասաւորումները` նկատի ունենալով, որ անիկա 720 աթոռներէն 398-ը ապահոված է:

Պելճիքայի Վարչապետը Հրաժարեցաւ

Պելճիքայի վարչապետ Ալեքսանտր Տէ Քրուն յայտարարած է, որ կը հրաժարի` իր ղեկավարած «Բաց ֆլամանական ազատականներու եւ ժողովրդավարներու» կուսակցութեան ազգային եւ Եւրոպական խորհրդարանի ընտրութիւններուն մէջ կրած մեծ պարտութենէն ետք: Այս մասին կը հաղորդէ գերմանական «Տէօչէ Վելլէ»-ն:

«Մենք այս ընտրութիւններուն պարտուած ենք: Ես էի քարոզարշաւի դէմքը: Ասիկա այն արդիւնքը չէ, որ մենք կ՛ակնկալէինք: Ես կը ստանձնեմ ամբողջ պատասխանատուութիւնը: Վաղը հրաժարական պիտի տամ վարչապետի պաշտօնէն, սակայն ազատականները ուժեղ են, մենք պիտի վերադառնանք», ըսած է Տէ Քրուն:

«Տի.Փի.Էյ.» լրատու գործակալութիւնը կը հաղորդէ, որ վարչապետը այս յայտարարութեան ժամանակ յուզուած եւ լացած է: