Սուրիահայութիւնը միասնական շարքերով մասնակցեցաւ Սուրիոյ Խորհրդարանի օրէնսդրական 4-րդ նստաշրջանի ընտրութիւններուն

«Գանձասար» կը հաղորդէ, որ երկուշաբթի, 15 յուլիս 2024-ի առաւօտեան ժամը 7:00-էն սկսեալ սուրիահայութիւնը, իր համայնքապետներով, հայկական կազմակերպութիւններու, բոլոր միութիւններու ներկայացուցիչներով եւ ժողովրդային խիտ շարքերով, Սուրիոյ զանազան նահանգներուն մէջ մասնակցեցաւ Սուրիոյ խորհրդարանի օրէնսդրական 4-րդ նստաշրջանի ընտրութիւններուն:

Հալէպի մէջ, Բերիոյ հայոց թեմի առաջնորդ Մակար արք. Աշգարեան, Բերիոյ թեմի կաթողիկէ հայոց առաջնորդ Պետրոս արք. Միրիաթեան, Սուրիոյ Հայ աւետարանական համայնքի պետ վերապատուելի դոկտ. Յարութիւն Սելիմեան, հալէպահայ երեք կազմակերպութիւններու եւ բարեսիրական, մշակութային, մարզական բոլոր միութիւններու ներկայացուցիչներ, ազգի միասնական թեկնածու Մարիա Մանուկի (Գաբրիէլեան) եւ Ազգային երեսփոխանական ժողովի ու վարչութեան ներկայացուցիչներուն հետ ուղղուեցան ընտրական կեդրոն` մասնակցելու քուէարկութեան:

Ընտրական կեդրոններուն մէջ քուէարկութեան աշխատանքի հեզասահ ընթացքին, ինչպէս նաեւ ընտրութեան նախապատրաստական աշխատանքներուն կամաւորաբար կը մասնակցէին հալէպահայ միութիւններու երիտասարդ-երիտասարդուհիները:

Աղբիւրը` Ազդակ