Յայտարարութիւն ՀՀ ԿԳՄՍ Նախարարի եւ Հայ հոգեւոր ձեռագրական կեդրոնների ներկայացուցիչների համատեղ քննարկման վերաբերեալ
Հայագիտական միջազգային քոնկրեսին ընդառաջ, 2024թ. յուլիսի 17-ին Մաշտոցեան մատենադարանում առաջին անգամ տեղի ունեցաւ հայ հոգեւոր ձեռագրական կեդրոնների ներկայացուցիչների հանդիպում-քննարկում:
Հանդիպման մասնակիցները ներկայացրել են ձեռագիր հաւաքածուների ներկայ վիճակը, վերականգնման ոլորտում առկայ խնդիրները, ինչպէս նաեւ` համատեղ ուսումնասիրութիւնների, դրանցում բարձր արհեստագիտութիւնների կիրառման, ցուցադրութիւնների եւ հրատարակութիւնների հնարաւորութիւնները: Քննարկուել են ձեռագրական կեդրոնների միջեւ առկայ համագործակցութիւնն ընդլայնելու, ամրապնդելու եւ համընդգրկուն դարձնելու միջոցներն ու հեռանկարները: Մասնակիցները ցանկութիւն են յայտնել շարունակել նշուած ոլորտներում գոյութիւն ունեցող փոխգործակցութիւնը եւ նպաստել դրա խորացմանը:
ՀՀ ԿԳՄՍ նախարար Ժաննա Անդրէասեանը ներկայացրել է հայերէն գրաւոր ժառանգութեան պահպանման եւ հայագիտութեան ոլորտներում Հայաստանի Հանրապետութեան պետական քաղաքականութեան առաջնահերթութիւններն ու ծրագրերը: Նախարարը մեծապէս արժեւորել է հայ հոգեւոր ձեռագրական կեդրոնների համագործակցութիւնը եւ այդ գործում Մատենադարանի նախաձեռնողականութիւնը` դրանք համարելով հայերէն գրաւոր մշակոյթի պահպանման կարեւոր նախապայման:
Բարձր գնահատելով հանդիպման կարեւորութիւնը` մասնակիցներն ընդգծել են Հայագիտական միջազգային քոնկրեսի` որպէս համագործակցութեան ամրապնդման եւ առկայ խնդիրների լուծման հարթակ դառնալու անհրաժեշտութիւնը:
Մեսրոպ Մաշտոցի անուան Մատենադարան
Մայր Աթոռ Սուրբ Էջմիածին
Մեծի Տանն Կիլիկիոյ կաթողիկոսութիւն
Երուսաղէմի հայոց պատրիարքութիւն
Կ. Պոլսոյ հայոց պատրիարքութիւն
Զմմառու պատրիարքական կղերի միաբանութիւն
Վենետիկի Մխիթարեան միաբանութիւն
Վիեննայի Մխիթարեան միաբանութիւն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
