Եւրոպայի մէջ Ամերիկեան ռազմակայանները բերուած են մարտական պատրաստութեան

Եւրոպայի տարածքին մէջ գտնուող ամերիկեան շարք մը ռազմակայաններ 29 եւ 30 յունիսին բերուած են մարտական պատրաստութեան:

Ռազմակայաններու ուժային պաշտպանութեան մակարդակը բարձրացուած է երկրորդ աստիճանի` առնչուած այն մտավախութիւններուն, թէ ամերիկեան զօրքերը կամ ռազմակայանները կրնան ենթարկուիլ ահաբեկչական յարձակումի: Այս մասին յայտնած է «Սի.Էն.Էն.»-ը` վկայակոչելով երկու անանուն ամերիկացի պաշտօնատարներ:

Նշեալ ռազմակայաններուն մէջ, ներառեալ Միացեալ Նահանգներու Շթութկարթի կայազօրը, ուր տեղակայուած է Միացեալ Նահանգներու Եւրոպական հրամանատարութիւնը, 30 յունիսին զինեալ ուժերու պաշտպանութիւնը հասցուած է «Չարլի» մակարդակի:

Ըստ ամերիկեան բանակին, այս մակարդակը կ՛օգտագործուի, «երբ միջադէպ տեղի կ՛ունենայ կամ կայ հետախուզական տեղեկութիւն, որ կը վկայէ զինուորական անձնակազմի կամ ռազմակայաններու վրայ յարձակման կամ ահաբեկչութեան հաւանականութիւն»:

«Սի.Էն.Էն.»-ի աղբիւրներէն մէկը, որ կը գտնուի Եւրոպայի ամերիկեան ռազմակայաններէն մէկուն մէջ, ընդգծած է, որ սպառնալիքի այս մակարդակը իրենց մօտ չէր յայտարարուած «առնուազն 10 տարիէ ի վեր»:

«Ատիկա կը նշանակէ, որ զինուորականները տեղեակ են գործօն սպառնալիքի մասին», ըսած է ան:

Միացեալ Նահանգներու Եւրոպական հրամանատարութեան բանբեր Տեն Տէյ մերժած է մեկնաբանել տեղեկութիւնը: Բայց եւ այնպէս ան նշած է, որ հրամանատարութիւնը «շարունակաբար կը գնահատէ բազմաթիւ գործօններ, որոնք կ՛ազդեն արտասահմանի մէջ ամերիկացի զինուորներու անվտանգութեան վրայ»:

Աղբիւրը՝ Ազդակ