Եւրոպական Խորհուրդի Նախագահ Շարլ Միշէլ կոչ ուղղեց՝ աւարտին հասցնելու խաղաղութեան համաձայնագիրը

Եւրոպական խորհուրդի նախագահ Շարլ Միշէլ 18 Յուլիսին, Լոնտոնի մէջ տեղի ունեցած Եւրոպական քաղաքական համայնքի գագաթնաժողովի ծիրին մէջ, երկկողմ հանդիպումներ ունեցաւ Հայաստանի եւ Ատրպէյճանի ղեկավարներուն հետ` փորձելով վերաշխուժացնել կողմերուն միջեւ խաղաղութեան շուրջ ընթացող բանակցութիւնները:

Ըստ «Արմէնփրէս»ի՝ այս մասին կը յայտնէ «Փոլիթիքօ»ն` վկայակոչելով երկու բարձրաստիճան դիւանագէտներուն հետ ունեցած զրոյցը:

Ըստ աղբիւրին` Շարլ Միշէլ կը վերահսկէ Հարաւային Կովկասի մէջ կայուն խաղաղութիւն հաստատելու ջանքերուն, որովհետեւ պատերազմէն տուժած տարածաշրջանին մէջ լարուածութիւնը կ՛աւելնայ:

Միշէլ նաեւ նամակ գրած է երկու կողմերուն` կոչ ուղղելով՝ վերադառնալու բանակցութիւններու սեղան եւ աւարտին հասցնելու խաղաղութեան համաձայնագիրը` յառաջընթաց արձանագրելով տակաւին չլուծուած հարցերու մէջ, ինչպէս օրինակ՝ սահմաններու սահմանազատումը:

Թերթը կը տեղեկացնէ, որ սակայն, Պրիւքսէլի մէջ հիասթափութիւնը կ՛աւելնայ, մանաւանդ որ ամիսներ տեւած ձգձգումները եւ դիւանագիտական փակուղին լ չկրցան երկար սպասուած զինադադարը իրականութիւն դարձնել:

«Հակառակ Միշէլի հետ հանդիպումներուն` Հայաստանի վարչապետ Նիկոլ Փաշինեան եւ Ատրպէյճանի նախագահ Իլհամ Ալիեւ չկրցան կարելիութիւն գտնել բանակցութիւններու սեղանին նստելու համար` առճակատման մէջ զիրար մեղադրելով: Վերջապէս, երկու կողմերն ալ պէտք է դադրին խաղեր խաղալէ եւ կնքեն համաձայնագիրը, որովհետեւ նախագահ Միշէլ՝ Եւրոպական Միութեան ուժերու սահմաններուն մէջ ըրած է կարելի ամէն ինչ` խաղաղութեան համաձայնագիրի հասնելու ուղղութեամբ», կը նշէ Միշելին մօտիկ Եւրոպական Միութեան բարձրաստիճան դիւանագէտ մը:

Աղբիւրը` Ասպարէզ