Կարինի պատմական յուշարձանները ախոռի վերածուած են
Օլթուի (Կարինի շրջան) վերականգնուած ռուսական եկեղեցւոյ մէջ անասուններ կ՚որոճան։ Թէեւ 3,2 միլիոն լիրա ծախսուած է եկեղեցւոյ վերանորոգման համար, սակայն կառոյցը տակաւին չէ բացուած զբօսաշրջիկներու։
Ըստ Akunq.net-ի, լուրը կը հաղորդէ Artigerçek լրատու կայքը։
Աղբիւրը կը յիշեցնէ, որ Թուրքիոյ Տնտեսական համագործակցութեան կազմակերպութիւնը Էրզրումը (Կարին) հռչակած է 2025-ի զբօսաշրջութեան մայրաքաղաք։ Սակայն վերջերս հոն վերանորոգուած Օլթուի ռուսական եկեղեցին եւ Ազիզիէի ամրոցային համակարգը վերածուած են ախոռի, ուր կ՚որոճան անասունները։
2017-ին միլիոնաւոր լիրաներով վերականգնուած եւ նախկին տեսքը ստացած ռուսական եկեղեցին մատնուած է ճակատագրի քմահաճոյքին։ Քանի որ եկեղեցին չէ վերաբացուած, գիւղացիները իրենց անասունները կ՚արածեն եկեղեցւոյ տարածքին։
Աղբիւրը` Արեւելք
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
