Արցախի Իշխանաւորները այցելեցին «Եռաբլուր»

19 սեպտեմբերին «Եռաբլուր» զինուորական պանթէոն այցելեցին Արցախի  նախագահ Սամուէլ Շահրամանեանը, Ազգային ժողովի նախագահի պարտականութիւնները կատարող Գագիկ Բաղունցը, պատգամաւորներն ու պաշտօնեաները, որոնք իրենց յարգանքի տուրքը մատուցեցին արցախեան նահատակներուն յիշատակին:

Լրագրողներուն հետ ունեցած զրոյցին ընթացքին Ս. Շահրամանեան ըսաւ. «Ռազմական գործողութիւններուն հետեւանքով մեր բնակչութիւնը ստիպուած եղած է լքել իր հայրենիքը, եւ մենք մշտապէս մեր յիշողութեան մէջ պիտի ունենանք այն նուիրեալներուն անունները, որոնք իրենց կեանքին գնով պաշտպանած են մեր հայրենիքը»:

Ան յայտնեց, որ 19 սեպտեմբերը  յիշողութեան մէջ պիտի մնայ իբրեւ օր մը, երբ 10 ամիս շրջափակումէն, այնուհետեւ 4 ամիս լիակատար պաշարումէն ետք ազրպէյճանական կողմը դիմեց ռազմական յարձակման` պատճառելով զոհեր ու տուժածներ:

Հայաստանի իշխանութիւններու յայտարարութիւններուն վերաբերող հարցումի մը ի պատասխան`  Արցախի նախագահը նշեց, որ ցաւով կը լսէ զանոնք. «Ցաւով կը լսեմ նման արտայայտութիւնները, ներառեալ բարձրաստիճան պաշտօնեաներու կողմէ, որոնք կը նկատեն, որ մենք` արցախցիներս, հիւր ենք Հայաստանի մէջ, որոնք կը նկատեն, որ Արցախը Ազրպէյճանի կազմին մէջ ճանչնալը Հայաստանի Հանրապետութեան յաղթանակ է: Մեծ կասկածներ ունիմ, որ Հայաստանի Հանրապետութեան կառավարութեան բոլոր անդամները այդպէս կը մտածեն եւ Հայաստանի Հանրապետութեան ժողովուրդը այդպէս կը մտածէ: Ես ոչինչ ունիմ ըսելիք այդ մարդոց, իրենց պատասխանները իրենք պէտք է տան այն քաղաքացիներուն, որոնք ձեւաւորած են իշխանութիւնները»:

Արցախի Հանրապետութեան Ազգային ժողովի նախագահի պարտականութիւնները կատարող ագիկ Բաղունց եւս յայտնեց, որ մէկ տարի առաջ Արցախի մէջ տեղի ունեցած ողբերգութիւնը այդպէս ալ դաս չդարձաւ հայ ժողովուրդին համար:

«Տեղի ունեցածը ինչպէս ալ անուանենք` թէ՛ ցեղասպանութիւն, թէ՛  ցեղային զտում, թէ՛ բռնի տեղահանում, այնուամենայնիւ կը հանդիսանայ  մէկ դար առաջ տեղի ունեցած Մեծ եղեռնի շարունակութիւնը: Ցաւօք, Հայաստանի Հանրապետութեան իշխանութիւնները, խօսելով երկրի անվտանգութեան մասին, որ կ՛ենթադրէ երկու բաղադրիչ` հզօր բանակի ստեղծում եւ զուգահեռ խաղաղութեան օրակարգը, այնուամենայնիւ նման արտաքին քաղաքականութիւնը արդիւնաւէտ կ՛ըլլայ այդ երկու ռազմավարութիւններու ներդաշնակութեան մէջ, ինչ որ, ցաւօք, չի դիտուիր մեր արտաքին քաղաքականութեան մէջ: Մենք կտրուկ շեշտ կը դնենք միայն խաղաղութեան օրակարգի վրայ` մեր յոյսը դնելով անոր վրայ, որ ատով իսկ կարելի է ապահովել երկրի անվտանգութիւնը», նշեց ան` շեշտելով, որ նման քաղաքականութիւնը նման է Սթոքհոլմեան համախտանիշին, որուն պարագային զոհը կը փորձէ սէր եւ ըմբռնում դրսեւորել ահաբեկիչին նկատմամբ:

Ըստ անոր, այս դիրքորոշումը Ազրպէյճանի եւ Թուրքիոյ նման դրացիներու հետ յարաբերութիւններուն մէջ դժուար թէ փափաքելի արդիւնք տայ:

Արձագանգելով այն դիտարկման, թէ պարբերաբար մեղադրանքներ կ՛ուղղուին, որ Արցախը չկայ, քանի որ Արցախի նախագահ Սամուէլ Շահրամանեանը փաստաթուղթ ստորագրած է` Բաղունց ըսաւ, որ փաստաթուղթը իրաւական ուժ չունի, իսկ ստորագրութիւնը ստիպողական քայլ էր` 120.000 արցախցիները փրկելու եւ Արցախէն դուրս բերելու համար:

Հայաստանի իշխանութիւններուն կողմէ Արցախի նախագահի եւ արցախցի այլ պաշտօնեաներուն դէմ կատարուած գործողութիւններուն ու յայտարարութիւններուն մասին Բաղունց նշեց, որ իրեն համար զարմանալի է, թէ պետական մակարդակով կ՛առնուին քայլեր, որոնք կարելի է այլ հարթակի վրայ լուծել` փոխըմբռնման ու բանակցութիւններու միջոցով` հաշուի առնելով համապատասխան իրաւական եզրերը:

Անդրադառնալով արցախցիներուն` Արցախ վերադարձի եւ առհասարակ Արցախի հարցը փակելուն` Բաղունց նշեց, որ այդ հարցը կարելի չէ փակել, եւ խնդիրը իրենք միշտ ալ օրակարգի վրայ պիտի պահեն:

Պատասխանելով այն հարցումին, թէ ինք որքանով բաւարար կը գտնէ Հայաստանի իշխանութիւններուն ջանքերը` ուղղուած Պաքուի մէջ պահուող Արցախի ռազմաքաղաքական ղեկավարութեան ազատ արձակման` ան ըսաւ. «Բաւական է ըսել, որ այնպիսի հզօր կարելիութիւն, որ ունի Հայաստանի Հանրապետութեան իշխանութիւնը` բանակցային գործընթացին մէջ առանցքային խնդիրներէն մէկը դարձնել Արցախի ռազմաքաղաքական ղեկավարութեան վերադարձը, չ՛օգտագործուիր, ինչ որ կը կարծեմ լուրջ բացթողում է»:

Աղբիւրը` Ազդակ