Լիբանանի վրայ Իսրայէլեան յարձակումները կը շարունակուին. Հըզպալլա Աքքայի մէջ ռազմարդիւնաբերական գործարան մը հարուածեց

Հըզպալլա յայտարարեց, որ քամիքազ անօդաչու թռչող սարքերով յարձակում գործած է Աքքայի հարաւ-արեւելքը գտնուող ռազմարդիւնաբերութեան «Եուտիվաթ» ընկերութեան վրայ, ինչպէս նաեւ մեծաթիւ հրթիռներով հրթիռակոծած է Հայֆայի հիւսիսը գտնուող ռազմարդիւնաբերութեան «Զոֆոլոն» ռազմակայանը:

Կուսակցութիւնը հրթիռակոծած է Պաուապեթ Ֆաթմէի, Մալիքիէի եւ Քարմայէլի մէջ հաւաքուած իսրայէլեան ուժերը:

Հըզպալլա հրթիռակոծեց նաեւ Քարմայէլի մէջ օդուժի պահեստամասեր արտադրող «Պազ» ռազմակայանը:

Իսրայէլեան օդուժը իր կարգին յարձակումներ գործեց հարաւային Լիբանանի գիւղերուն վրայ եւ 14 գիւղերու բնակիչներէ պահանջեց լքել իրենց բնակավայրերն ու Աուալի գետէն հիւսիս ուղղուիլ:

Իսրայէլեան բանակը նաեւ յայտարարեց, որ ուրբաթ օր ահաբեկած է Հըզպալլայի Պընթ Ժպէյլի շրջանի հրամանատար Ահմետ Ժաաֆար Մաաթուքը:

Իսրայէլեան օդուժը նաեւ յայտարարեց, որ վերջին 24 ժամուան ընթացքին Լիբանանի տարածքին 120 յարձակումներ գործած է, ներառեալ Պէյրութի Հարաւային արուարձաններուն մէջ զէնքերու արտադրման եւ պահեստաւորման համար օգտագործուող դիրք մը:

Լիբանանի առողջապահութեան նախարարութիւնը երէկ յայտնեց, որ Սայտայի վրայ կատարուած իսրայէլեան յարձակումներու հետեւանքով առնուազն 5 անձեր զոհուած են եւ 13 ուրիշներ վիրաւորուած:

Իսրայէլեան աղբիւրներ իրենց կարգին նշեցին, որ հարաւային Լիբանանի մէջ բախումներու ընթացքին սպաննուած են 4 իսրայէլացի զինուորներ, ներառեալ 2 սպաներ: Անոնք նաեւ նշեցին, որ վերջին 48 ժամուան ընթացքին 88 իսրայէլացի զինուորներ վիրաւորուած են:

Աղբիւրը` Ազդակ