Իսրայէլ 3-րդ անգամ ըլլալով յարձակում գործեց մայրաքաղաք Պէյրութի վրայ

Իսրայէլեան օդուժը երէկ գիշեր յարձակում գործեց Պէյրութի Նուէյրի շրջանին վրայ: Նուէյրիի վրայ յարձակումը Լիբանանի վրայ իսրայէլեան յարձակումներու սկիզբէն ի վեր մայրաքաղաք Պէյրութի վրայ 3-րդ յարձակումն է: Նախորդները Քոլայի եւ Պաշուրայի վրայ եղած էին:

Յարձակումը շէնքի մը վրայ էր, որ մեծապէս վնասուեցաւ: «Ռոյթըրզ» հաղորդեց, որ արձանագրուած է առնուազն 2 զոհ եւ 9 վիրաւոր:

Իսրայէլեան պատկերասփիւռի 12-րդ կայանը կը հաղորդէ, որ Պէյրութի մէջ իսրայէլեան յարձակումին թիրախը Հըզպալլայի «պաշտպանութեան նախարար» Ուաֆիք Սաֆան է:

Աւելի ուշ հաղորդուեցաւ, որ Ռաս Նապայի եւ Նուէյրիի մէջ երկու շէնքեր յարձակումի ենթարկուած են, որոնցմէ մէկը ամբողջութեամբ փուլ եկած է, իսկ երկրորդին մէջ թիրախը յարկաբաժին մըն էր:

Լիբանանեան ապահովական աղբիւր մը «Ռոյթըրզ»-ին յայտնած է, թէ Պէյրութի վրայ իսրայէլեան յարձակումին թիրախը Հըզպալլայէն առնուազն մէկ ղեկավար է:Հըզպալլան երէկ մեծաթիւ հրթիռներով հրթիռակոծեց հիւսիսային Իսրայէլի մէջ Պէյթ Հէյլելը, Քիրիաթ Շմոնա բնակեցման վայրը եւ Մարժ ու Մահիան Պարուխ դիրքերը եւ շարք մը այլ շրջաններ:

Կուսակցութեան մարտիկները նաեւ քանդեցին իսրայէլեան հրասայլ մը, որ Ռաս Նաքուրայի մէջ կը յառաջանար` անոր անձնակազմին մէջ պատճառելով զոհեր եւ վիրաւորներ:

Հըզպալլան հրթիռակոծեց Քաֆար Կիլատիի մէջ հաւաքուած իսրայէլացի զինուորներ:

«Իսրայէլ Հայոմ» նշեց, որ Լիբանանէն արձակուած հրթիռ մը ինկած է վերին Գալիլիոյ Մարկլիոթ քաղաքին մէջ շէնքի մը վրայ` պատճառելով նիւթական մեծ վնասներ:

Հըզպալլա իր կարգին յայտնեց, որ մեծաթիւ հրթիռներով հարուածած է Քիրիաթ Շմոնան, որուն քաղաքապետը քաղաքի բնակիչներուն կոչ ուղղեց ապաստանարաններ մուտք գործել:

Հըզպալլայի մարտիկները նաեւ թիրախաւորեցին իսրայէլեան ուժ մը, որ Ռաս Նաքուրայի շրջանէն կը փորձէր հարաւային Լիբանանի Մշայրֆէ շրջան ներթափանցել:

«Հատաս»-ի համաձայն, երէկ մինչեւ կէսօրէ ետք Լիբանանէն Իսրայէլի ուղղութեամբ աւելի քան 170 հրթիռներ արձակուած են:

Կուսակցութիւնը նաեւ Հայֆայի եւ Քարմելի մէջ ռազմակայաններու, հաղորդակցութիւններու կեդրոններու եւ այլ կենսական վայրերու «Հուտհուտ» տիպի անօդաչու թռչող սարքի ճամբով նկարուած լուսանկարներ հրապարակեց:

Իսրայէլեան բանակը պնդեց, որ իր գործողութիւններուն ընթացքին Հըզպալլայի աւելի քան 500 զինուորական ենթակառոյցներ քանդած է:

Իսրայէլեան անօդաչու թռչող սարք մը երէկ երկու անգամ յարձակում գործեց Զահլէի Քարաք շրջանի բարձունքներուն վրայ:

Քարաքի մէջ 4 զոհ եւ 17 վիրաւոր արձանագրուած է:

Աղբիւրը` Ազդակ