«Հըզպալլա»ի եւ Իսրայէլի միջեւ ցամաքային առաջին ճակատումին պատճառով առնուազն 8 Իսրայէլացի զինուորներ սպաննուեցան

Հարաւային Լիբանան ներխուժած իսրայէլեան ուժերը Չորեքշաբթի օր, «Հըզպալլա»ի զինեալներուն հետ ունեցան իրենց առաջին յատկանշական ճակատումները, որոնց աւարտին Իսրայէլ յայտարարեց, թէ առնուազն 8 իսրայէլացի զինուորներ սպաննուած են։

«Հըզպալլա»ի աղբիւրները հաղորդեցին, թէ երկու գիւղերու մէջ կրցած են ետ մղել իսրայէլեան ուժերը, մեծ թիւով զոհեր եւ վիրաւորներ պատճառելով։

 Չորեքշաբթի օր, իսրայէլեան հրետանին եւ օդուժը շարունակեցին ռմբակոծել հարաւային Լիբանանը, առաւել քան 10 լիբանանցիներ սպաննելով։

Նոյն օրը, իսրայէլեան ուժերը ծանրօրէն ռմբակոծեցին Կազան։ Թիրախներուն շարքին էին երկու դպրոցներ եւ որբանոց մը։ Արձանագրուած 51 զոհերուն շարքին էին առնուազն 7 կիներ եւ 12 մանուկներ ու պատանիներ։

Իսրայէլ նաեւ կը սպառնայ «չափազանց ուժեղ կերպով հակադարձել» Իրանի կողմէ Երեքշաբթիէն Չորեքշաբթի լուսցող գիշերուան ընթացքին կատարուած  յարձակումին:Իրանի կառավարութիւնը յայտարարեց. «Անկեղծ խոստում 2» գործողութիւնը միջազգային օրէնքներու ծիրին մէջ մեր ազգային շահերը պաշտպանելու համար էր»:

Իրանի պաշտպանութեան նախարարութիւնն ալ յայտարարեց. «Եթէ սիոնական գոյացութիւնը կամ անոր թիկունք կանգնողները ռազմավարական սխալ մը գործեն, մեր հակադարձութիւնը շատ աւելի քանդիչ պիտի ըլլայ»:

Իրանի Յեղափոխական պահակագունդը յայտարարեց, որ Իսրայէլի մէջ ապահովական եւ զինուորական կարեւոր թիրախներ հարուածած է, արձակուած 200 հրթիռներուն 90 առ հարիւրը իր թիրախը ճշգրիտ կերպով հարուածած է:

Յեղափոխական պահակագունդը հաղորդեց, որ գործողութիւնը շղթայազերծուած է Ազգային անվտանգութեան բարձրագոյն խորհուրդին որոշումով եւ իրանեան բանակին աջակցութեամբ` աւելցնելով, որ անիկա կը յաջորդէ ինքնազսպումի փուլին եւ հակադարձութիւն է պաղեստինեան Համաս շարժումի քաղաքական գրասենեակի ղեկավար Իսմայիլ Հանիէի, Հըզպալլայի ընդհանուր քարտուղար սէյիտ Հասան Նասրալլայի ահաբեկման, ինչպէս նաեւ Իրանի ինքնապաշտպանութեան իրաւական իրաւունքի ծիրին մէջ է:

Իրանի բանակի սպայակոյտը սպառնաց լայնածաւալ եւ համապարփակ ձեւով քանդել Իսրայէլի ենթակառոյցները, եթէ հրթիռային յարձակումին հակադարձէ:

Իրանի արտաքին գործոց նախարարութիւնը հաղորդեց. «Փաստեցինք, որ Իրանի ձեռքը երկար է եւ կրնայ իր ուզած որեւէ շրջան հասնիլ»:

«Սիոնական գոյացութիւնն ու անոր թիկունք կանգնողները պէտք է իմանան, որ Իրան վճռական կերպով կը գործէ եւ ըսածը կը գործադրէ», աւելցուց նախարարութիւնը:

Իրանի արտաքին գործոց նախարարութիւնը նաեւ նշեց. «Հաւանական է, որ Իսրայէլի հետ դիմակայութիւնը յառաջիկայ օրերուն շարունակուի, եւ մեր ուժերը պատրաստ են»:

«Ռոյթըրզ» լրատու գործակալութիւնը հաղորդեց, որ Իրանի արտաքին գործոց նախարար Ապպաս Արաղչի յայտնած է. «Իսրայէլի վրայ հրթիռային յարձակումէն ետք Միացեալ Նահանգները զգուշացուցինք միջամտելէ»:

Իրանի խորհրդարանի նախագահ Մոհամետ Պաքեր Քալիպաֆ յայտնած է, որ Իսրայէլի կողմէ որեւէ յարձակումի մեր յաջորդ հակադարձութիւնը տարբեր մակարդակի վրայ պիտի ըլլայ:

Իսրայէլեան «Ետիոթ Ահրոնոթ» օրաթերթը հաղորդեց, որ Իսրայէլի մէջ Հոտ Հաշարոնի քաղաքապետարանը յայտնած է, թէ քաղաքին մէջ շուրջ 100 բնակարաններ վնասուած են:

Իսրայէլացի պաշտօնատարներ ամերիկեան «Աքսիոս» կայքին յայտնեցին. «Իսրայէլ քանի մը օրէն իրանեան մեծ յարձակումին ուժեղ հակադարձութիւն մը պիտի շղթայազերծէ»:

«Սպասուող հակադարձութիւնը կը թիրախաւորէ Իրանի մէջ քարիւղի արտադրման վայրեր եւ այլ ռազմավարական դիրքեր», նշած են պաշտօնատարները:

Իսրայէլացի պաշտօնատար մը ամերիկեան «Էյ.Պի.Սի.» պատկերասփիւռի կայանին յայտնեց. «Իսրայէլ արագ կերպով պիտի հակադարձէ Իրանի թեւաւոր հրթիռներով յարձակումին»:

Մինչ այդ, Իրանի նախագահ Մասուտ Փեզեշքիան երէկ այցելեց Տոհա:

Ֆրանսայի նախագահ Էմանուել Մաքրոն բուռն կերպով դատապարտեց «Իսրայէլի վրայ իրանեան նոր յարձակումները»` աւելցնելով, որ իր երկիրը յանձնառու է Իսրայէլի անվտանգութեան եւ չորեքշաբթի օր Միջին Արեւելքի մէջ իր զինուորական միջոցները կուտակած է:

Ճափոնի վարչապետ Շիկիրօ Իշիպա յայտնեց. «Իսրայէլի վրայ իրանեան հրթիռային յարձակումը անընդունելի է»` աւելցնելով. «Զայն բուռն կերպով պիտի դատապարտենք, սակայն միեւնոյն ժամանակ կ՛ուզենք Միացեալ Նահանգներու հետ գործակցիլ` կացութեան հանդարտեցման եւ դէպի համապարփակ պատերազմ մագլցում արձանագրելու համար»:

Գերմանիոյ վարչապետ Օլաֆ Շոլց յայտնեց. «Իսրայէլի վրայ իրանեան յարձակումը իր մէջ Միջին Արեւելքի բռնկման վտանգը կը պարունակէ»:

Աղբիւրը՝ Ասպարէզ