Հըզպալլա կը շարունակէ հրթիռակոծել, իսկ Իսրայէլ կը շարունակէ Լիբանանի վրայ իր յարձակումը

Իսրայէլեան օդուժը երէկ առաւօտեան յարձակումներ գործեց հարաւային Լիբանանի եւ արեւելեան Պեքայի գիւղերուն վրայ, մինչ Հըզպալլա շարունակեց հրթիռակոծել Գալիլիոյ շրջանը:

Նշենք, որ իսրայէլեան օդուժը կիրակի գիշեր յարձակումներ գործեց Պէյրութի Հարաւային արուարձաններուն եւ այլ շրջաններու մէջ «Քարտ Հասան» հաստատութեան կեդրոններուն վրայ: Միայն Պէյրութի Հարաւային արուարձաններուն մէջ աւելի քան 11 յարձակումներ գործուեցան:

Իսրայէլեան օդուժը երէկ առաւօտեան յարձակումներ գործեց Պաալպեքի եւ Հազին գիւղին վրայ, իսկ հարաւային Լիբանանի մէջ Հանին եւ Ռամիա գիւղերուն վրայ:

Գալիլիոյ Սաֆատ շրջանի «Զէյֆ» հիւանդանոցը հաղորդեց, որ մէկ գիշեր առաջ իսրայէլեան հիւսիսի մէջ բախումներու վայրերէն 15 վիրաւորներ ընդունած է:

Հըզպալլան հրետանիով ռմբակոծեց Պլիտա գիւղին մէջ Քենաան բարձունքին վրայ հաւաքուած իսրայէլացի զինուորները: Կուսակցութիւնը արշալոյսին հրթիռակոծեց Քիրիաթ Շմոնա բնակեցման վայրը, «Պէյթ Հիլել» ռազմակայանը, Մալիքիէ դիրքին վրայ իսրայէլեան ուժեր եւ Օտեմի մէջ հրետանիի դիրքը:

Կուսակցութիւնը առաւօտեան ժամը 9:30-ին հրթիռակոծեց Մաալոթ Թերշիհա բնակեցման վայրը, ապա մեծաթիւ հրթիռներով հրթիռակոծեց Իլիթ Հաշահերի հիւսիսը գտնուող թիւ 100 ռազմակայանը:

Հըզպալլա նաեւ յայտարարեց, որ վար առած է իսրայէլեան «Հերմես 900» տիպի անօդաչու թռչող սարք մը, իսկ իսրայէլեան բանակը երէկ հաղորդեց, որ Միջերկրական ծովուն վրայ դէմ դրած է 5 անօդաչու թռչող սարքերու, որոնք չեն յաջողած Իսրայէլի օդային տարածք մուտք գործել:

Հըզպալլա նաեւ հարուածեց Հերմոն լերան վրայ գտնուող թիւ 2222 դիրքը:

Աղբիւրը՝ Ազդակ