Ամսթերտամի մէջ պաղեստինի զօրակցողներու հետ բախումներու ընթացքին 15 Իսրայէլացիներ վիրաւորուեցան

Իսրայէլի արտաքին գործոց նախարարութիւնը յայտարարեց, որ 15 իսրայէլացիներ վիրաւորուած են 7 ուրիշներու հետ կապը կորսուած է Ամսթերտամի մէջ տեղւոյն «Այաքս Ամսթերտամ» եւ «Մաքապի Թել Աւիւ» 5-0 արդիւնքով աւարտած ֆութպոլի խումբերուն միջեւ մրցումէն ետք տեղի ունեցած բռնարարքներու պատճառով:

Պաղեստինեան լրատուամիջոցներ հաղորդեցին, որ իսրայէլացիներու եւ Պաղեստինի համակիրներու միջեւ բախումները ընթացք առած են, երբ իսրայէլացի համակիրներ Պաղեստինի դրօշը պատռտած են:

Իսրայէլեան բանակը երէկ յայտարարեց, որ կը պատրաստուի ուժ մը Նետերլանտ ուղարկելու` իսրայէլացիներու տարհանման օժանդակելու համար:

Իսրայէլի ազգային անվտանգութեան խորհուրդը եւ արտաքին գործոց նախարարութիւնը յայտնեցին, որ իսրայէլացիները պէտք է Ամսթերտամի փողոցներ դուրս չգան եւ մնան իրենց պանդոկները:

Իսրայէլի վարչապետ Պենիամին Նեթանիահու Նետերլանտներու կառավարութեան կոչ ուղղեց` արագօրէն շարժելու իր հողերուն վրայ գտնուող իսրայէլացիներու անվտանգութիւնը երաշխաւորելու համար:

ՄԱԿ-ի մէջ Իսրայէլի դեսպան Տանի Տանոն «Էքս»-ի վրայ յարձակումէն տեսարաններ հրապարակելով զանոնք կոչեց «ջարդ»: «Ասիկա այն ծայրայեղական ահաբեկչութեան կողմնակիցներու իրական դէմքերն են, որոնց դէմ մենք կը պայքարինք», գրեց ան:

Նետերլանտներու խորհրդարանին մէջ մեծագոյն աջակողմեան Ազատութիւն կուսակցութեան ղեկավար Կերթ Վիլտերս իր կարգին կատարուածը որակեց «ջարդ» եւ նշեց. «Մենք դարձած ենք Եւրոպայի Կազան: Իսլամները պաղեստինեան դրօշներով կը հետապնդեն հրեաները»:

Վիլտերս նաեւ քննադատեց նետերլանտական իշխանութիւնները` Իսրայէլի քաղաքացիները պաշտպանել չկարենալուն համար` պահանջելով յարձակում գործողները պատասխանատուութեան ենթարկել:

Իսրայէլի նախագահ Իսհաք Հերցոկ յայտնեց. «Ամսթերտամի յարձակումները 7 հոկտեմբերի դէպքերը կը յիշեցնեն»:

Նետերլանտներու ոստիկանութիւնը յայտնեց, որ քաղաքի կեդրոնէն բախումներու մասին շարք մը հաղորդագրութիւններ ստացած է եւ անկարգութիւններէն ետք 57 անձեր ձերբակալած է:

Աղբիւրը` Ազդակ