Գերագոյն հոգեւոր խորհուրդը շեշտեց գերիներու վերադարձի եւ Արցախցիներու իրաւունքներու պաշտպանութեան հարցերը առկայծ պահելը
5էն 7 Նոյեմբերին, Սուրբ Էջմիածինի մէջ, նախագահութեամբ Ամենայն Հայոց Գարեգին Բ. կաթողիկոսին եւ Պոլսոյ Հայոց պատրիարք Սահակ արքեպիսկոպոս Մաշալեանի ատենապետութեամբ՝ տեղի ունեցաւ Գերագոյն հոգեւոր խորհուրդի ժողովը, որուն աւարտին հրապարակուեցաւ հետեւեալ հաղորդագրութիւնը.
«Ամենայն Հայոց կաթողիկոսի ողջոյնի եւ օրհնութեան խօսքից յետոյ ժողովը վարելու հրաւիրուեց Արեւմտեան Եւրոպայի հայրապետական պատուիրակ Խաժակ արքեպիսկոպոս Պարսամեանը:
«Սեպտեմբերի 27-30ին տեղի ունեցած Մայր Տաճարի վերաօծման, Միւռոնօրհնութեան արարողութիւնների եւ յարակից միջոցառումների վերաբերեալ ամփոփիչ զեկոյցով հանդէս եկաւ Համակարգող յանձնախմբի ատենապետ Արշակ արքեպիսկոպոս Խաչատրեանը: Ներկայացուեց, որ սրբազան արարողութիւններն անցկացուեցին մեծ հանդիսաւորութեամբ եւ ընդգրկեցին եկեղեցական ու ժողովրդական լայն մասնակցութիւն՝ նոր յոյս եւ հոգեւոր մխիթարութիւն պարգեւելով համայն հաւատաւոր մեր ժողովրդին: Ամփոփ տեղեկութիւններ փոխանցուեց արարողութիւններին մասնակիցների, հրատարակութիւնների, լուսաբանման, իրականացուած տեխնիկական ու կազմակերպչական աշխատանքների վերաբերեալ:
«Ժողովականներն իրենց որդիական երախտագիտութիւնը յայտնեցին Ամենայն Հայոց Հայրապետին Մայր Տաճարի հիմնակարգութեան համար՝ բարձր գնահատելով Մայր Տաճարի վերաօծման, Միւռոնօրհնութեան եւ յարակից միջոցառումների կազմակերպչական աշխատանքներում ներգրաւուած անձանց ջանքերը, ովքեր իրենց նպաստը բերեցին արարողութիւնների պատշաճ իրականացմանը:
«Մայր Աթոռի Վարչատնտեսական բաժնի տնօրէն Մուշեղ եպիսկոպոս Բաբայեանը Գերագոյն հոգեւոր խորհրդի ժողովին ներկայացրեց Մայր Աթոռում կատարուող բարեկարգման եւ շինարարական աշխատանքների ընթացքը: Այս կապակցութեամբ ԳՀԽ անդամները գոհունակութիւն յայտնեցին իրականացուող աշխատանքների առիթով՝ կարեւորելով համայն հայութեան հոգեւոր կենտրոնի բարեզարդմանն ու պայծառութեանն ուղղուած ջանքերը:
«Սփիւռքում ազգային ինքնութեան պահպանման հիմնախնդիրների մասին զեկուցեց Մայր Աթոռի Հայեցակարգային գրասենեակի տնօրէն Տ? Վազգէն արքեպիսկոպոս Միրզախանեանը՝ անդրադառնալով սփիւռքի համայնքներում ազգային ինքնութեանը, հայեցի կրթութեանը, հայոց լեզուի ու մշակոյթի անաղարտ պահպանմանը սպառնացող մարտահրաւէրներին, ինչպէս եւ դրանց յաղթահարմանն՝ ի նպաստ եկեղեցու ու սփիւռքում գործող ազգային կառոյցների դերակատարութեանը:
«Ընդգծելով հայրենիքում եւ սփիւռքում երիտասարդութեան ներգրաւմամբ համայնքների ամրապնդման, կրթական նոր ծրագրերի մշակման ու իրագործման, դպրոցների եւ մշակութային կենտրոնների զարգացման անհրաժեշտութիւնը, ազգային ինքնութեան պահպանման ու հոգեւոր արժէքների ամրապնդման հրամայականը՝ ԳՀԽ թելադրեց հարցի վերաբերեալ կատարել համակողմանի ուսումնասիրութիւն:
«Հայրենական կեանքում առկայ մարտահրաւէրների եւ դրանց յաղթահարման ուղղութեամբ գործադրուող ջանքերի, արցախահայերի իրաւունքների պաշտպանութեան, Արցախի հոգեւոր-մշակութային ժառանգութեան նկատմամբ Ադրբեջանի ոտնձգութիւնների եւ յուշարձանների պաշտպանութեան առնչութեամբ ձեռնարկուող քայլերի մասին զեկոյցներով հանդէս եկան Արցախի թեմի առաջնորդ Վրթանէս եպիսկոպոս Աբրահամեանը, արտակարգ եւ լիազօր դեսպան տիար Արտակ Ապիտոնեանը, Իրաւունքի եւ արդարութեան կենտրոն «Թաթոյեան» հիմնադրամի տնօրէն տիար Արման Թաթոյեանը, Արցախի մարդու իրաւունքների պաշտպան տիար Գեղամ Ստեփանեանը, Հայկական ճարտարապետութիւնն ուսումնասիրող հիմնադրամի (ՀՃՈՒՀ) փոխտնօրէն տիար Րաֆֆի Քորթոշեանը:
«ԳՀԽ անդամներն իրենց մտահոգութիւնն արտայայտեցին Հայաստանի անվտանգային եւ ներքաղաքական հիմնախնդիրների կապակցութեամբ՝ կարեւորելով ազգային միասնութեան եւ համախմբման անհրաժեշտութիւնը՝ ի նպաստ հայրենիքի զօրացման եւ ինքնիշխանութեան պահպանման:
«Ժողովականները հաստատեցին, որ մինչ օրս Ադրբեջանում ապօրինի պահուող գերիների վերադարձի, Արցախի հոգեւոր-մշակութային ժառանգութեան պահպանման, արցախահայերի իրաւունքների պաշտպանութեան, Ադրբեջանի ցեղասպան գործողութիւնների դատապարտման հիմնախնդիրները պէտք է բաց պահել միջազգային օրակարգում՝ զուգահեռ աշխատանքներ տանելով համազգային միաբանութեան, ազգային ներուժի կենտրոնացման, Հայաստան եւ սփիւռք գործակցութեան պատշաճ կազմակերպման ուղղութեամբ: Գերագոյն հոգեւոր խորհուրդը վերահաստատեց իր յանձնառութիւնն աջակցելու բոլոր այն նախաձեռնութիւններին, որոնք ուղղուած են հայ ժողովրդի իրաւունքների պաշտպանութեանը, ազգային ինքնութեան պահպանմանը եւ տարածաշրջանում խաղաղութեան հաստատմանը:
«ՔԴԿ տնօրէն Զաքարիա ծայրագոյն վարդապետ Բաղումեանը ժողովականներին ներկայացրեց Կիրակնօրեայ դպրոցների կրթական ծրագրի ճանապարհային քարտէզը, որի նպատակն է կիրակնօրեայ դպրոցների գործունէութեան համակարգումն ու մատաղ սերնդի հոգեւոր կրթութեան եւ դաստիարակութեան արդիւնաւէտութեան բարձրացումը:
«ԳՀԽ շնորհակալութեամբ ընդունեց զեկոյցը՝ թելադրելով մշակել եւ ներդնել միասնական կրթական ծրագրեր, որոնք կը համապատասխանեն ժամանակակից պահանջներին ու կը խթանեն երեխաների հոգեւոր-բարոյական նկարագրի եւ գիտակցութեան կերտմանն ու ազգային արժէքների պահպանմանը:
«ԳՀԽ քննարկեց նաեւ Եկեղեցական-ներկայացուցչական ժողովի (ԵՆԺ) գումարման հարցը: Անդրադարձ կատարուեց ժողովի նախապատրաստական աշխատանքներին՝ օրակարգի ձեւաւորմանը, պատգամաւորների ընտրութեանը եւ կազմակերպչական հարցերին:
«Ժողովի ընթացքում քննարկման առարկայ դարձան նաեւ թեմերի գործունէութեանը, եկեղեցու կանոնական եւ վարչական կեանքին առնչուող այլ հարցեր:
«Գերագոյն հոգեւոր խորհրդի ժողովն աւարտուեց Ամենայն Հայոց կաթողիկոսի օրհնութեան խօսքով եւ «Պահպանիչ» աղօթքով»:
Աղբիւրը` Ասպարէզ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
