Կարմիր Խաչի Միջազգային Կոմիտէն հոկտեմբերին տեսակցած է Ազրպէյճանի բանտերուն մէջ ապօրինի պահուող հայ գերիներուն հետ

Կարմիր խաչի միջազգային կոմիտէի ներկայացուցիչները Պաքուի բանտին մէջ այցելած են Արցախի նախկին քաղաքական եւ զինուորական ղեկավարներուն:

Այս մասին յայտարարած է Կարմիր խաչի Պաքուի գրասենեակի հանրային կապերու պատասխանատուն` նշելով, որ հանդիպման ընթացքին կալանաւորուած գործիչներուն հետ դէմ առ դէմ հանդիպումներ կազմակերպուած են, անոնց համար «հարազատներու հետ կապ հաստատելու կարելիութիւն ստեղծուած է»:

Ազրպէյճանի պետական ԱՓԱ լրատու գործակալութեան համաձայն, Կարմիր խաչի միջազգային կոմիտէի ներկայացուցիչները Արցախի նախկին ղեկավարներուն այցելած են հոկտեմբերին:

Ըստ պաշտօնական տուեալներու, Ազրպէյճանի մէջ հիմա 23 հայ գերութեան մէջ է, անոնցմէ 8-ն Արցախի ռազմաքաղաքական նախկին ղեկավարութիւնն է:

Պաքուն Արցախի նախկին պաշտօնատարներուն առաջադրած է ծանր մեղադրանքներ` ահաբեկչութենէն մինչեւ ապօրինի զինեալ խմբաւորումներու կազմակերպում: Եթէ դատարանը այդ մեղադրանքները հաստատէ, անոնք կրնան մինչեւ ցկեանս բանտարկութեան դատապարտուիլ:

Հայաստանի մէջ Կարմիր խաչի միջազգային կոմիտէի պատուիրակութեան հաղորդակցութեան ծրագիրներու ղեկավար Զառա Ամատունին իր կարգին յայտնած է, որ կոմիտէն հոկտեմբերին տեսակցած է Ազրպէյճանի բանտերուն մէջ ապօրինաբար պահուող հայ գերիներուն հետ:

Ամատունին նշեց, որ իւրաքանչիւրին կարելիութիւն տրուած է կապ հաստատել ընտանիքի անդամներուն հետ:

Աղբիւրը`Ազդակ