Իսրայէլեան բանակը Լիբանանի մէջ իր ցամաքային գործողութեան երկրորդ փուլին սկսաւ

Իսրայէլի հիւսիսային տարբեր շրջաններուն մէջ ահազանգներ հնչեցին, երբ Լիբանանէն արձակուած անօդաչու թռչող սարքեր շրջան մուտք գործեցին: Իսրայէլեան բանակը յայտարարեց, որ իր ուղղաթիռները Աքքայի վերեւ կը հետապնդեն Լիբանանէն եկած շարք մը անօդաչու թռչող սարքեր: Իսրայէլեան «Ետիոթ Ահրոնոթ» օրաթերթը յայտնեց, որ Հայֆայի արեւելքը գտնուող Նշերի մէջ ժողովրդային կեդրոնի մը մօտ անօդաչու թռչող սարք մը պայթած է:

Իսրայէլեան օդուժը երէկ շարունակեց հարաւային Լիբանանի եւ Պեքայի վրայ իր յարձակումները:

Իսրայէլեան օդուժը յարձակումներ գործեց Քֆարրըմման, Սըտտիքին, Շամահ, Մաժտալ Զուն, Տապաալ, Ժապալ Պութմ եւ Զըպքին գիւղերուն վրայ:

Լիբանանի առողջապահութեան նախարարութիւնը հաղորդեց, որ հիւսիսային Լիբանանի Աքքար նահանգի Այն Եաաքուպ գիւղին մէջ գտնուող շէնքի մը վրայ գիշերանց իսրայէլեան օդային յարձակումի մը պատճառով արձանագրուած են 8 զոհեր եւ 14 վիրաւորներ:

Ապահովական աղբիւր մը ԱՖՓ լրատու գործակալութեան յայտնեց, որ յարձակումի պատճառով քանդուած շէնքին մէջ կը բնակէր հարաւային Լիբանանէն տեղահանուած ընտանիք մը` նշելով, որ յարձակումին թիրախը նշեալ ընտանիքի մէկ անդամն էր, որ Հըզպալլայի անդամ է:

«Ժազիրա» կը նշէ, որ ասիկա առաջին անգամն է, որ իսրայէլեան օդուժը Իսրայէլի հետ սահմանէն  աւելի քան 100 քիլոմեթր հեռաւորութեան վրայ գտնուող շրջանը կը թիրախաւորէ:

Իսրայէլեան բանակը երէկ առաւօտեան Պէյրութի Հարաւային արուարձաններու մէջ կարգ մը շէնքերու բնակիչներու հրամայեց անոնցմէ հեռանալ: Աւելի ուշ, իսրայէլեան օդուժը Հարաւային արուարձաններուն վրայ աւելի քան 13 իրերայաջորդ յարձակումներ գործեց:

Միւս կողմէ, իսրայէլեան «Մաարիւ» օրաթերթը երէկ հաղորդեց. «Իսրայէլեան բանակը Լիբանանի մէջ իր ցամաքային գործողութեան երկրորդ փուլին սկսաւ»:

«Մաարիւ» նշեց, որ գործողութեան երկրորդ փուլին նպատակը Լիբանանի մէջ կարգաւորման բանակցութիւններուն հարցով Հըզպալլայի վրայ ճնշում բանեցնելն է:

Իսրայէլեան պետական ձայնասփիւռի կայանը հաղորդեց. «իսրայէլեան բանակի 36-րդ զօրամասը սկսաւ ցամաքային գործողութիւնը մինչեւ հարաւային Լիբանանի մէջ գիւղերու երկրորդ գիծը խորացնել»:

Հըզպալլա իր կարգին յայտարարեց, որ «Ֆետի 1» եւ «Մալաք 2» հրթիռներով հրթիռակոծած է Հայֆայի հիւսիսը գտնուող Քարիոթ շրջանը:

Կուսակցութիւնը հրթիռակոծեց Վերին Գալիլիոյ մէջ գտնուող Քաֆար Պլում բնակեցման վայրը: Հըզպալլայի մարտիկները հրթիռակոծեցին նաեւ Քաֆար Եովալ եւ Տիշոն բնակեցման վայրերը:

Հըզպալլայի մարտիկները առաւօտեան ժամը 10:15-ին Նապաթիէի վերեւ թռիչք կատարող իսրայէլեան «Հերմես 450» տիպի անօդաչու թռչող սարքի մը դէմ դնելով ստիպեցին, որ Լիբանանի տարածքէն հեռանայ: Անոնք նաեւ հարաւային Լիբանանի արեւմտեան շրջանին վերեւ թռիչք կատարող նոյն տիպի անօդաչու թռչող սարքի մը ստիպեցին հեռանալ լիբանանեան օդային տարածքէն:

Հըզպալլա յայտարարեց, որ տեսակարար հրթիռներով թիրախաւորած է Թել Աւիւի հարաւը գտնուող օդուժի «Թել Նով» ռազմակայանը:

Աղբիւրը՝ Ազդակ