Ուրուկուէյցի երեսփոխաններ եւ ծերակուտականներ Ազրպէյճանին կոչ կ՛ուղղեն ազատ արձակելու Պաքուի մէջ պահուող հայերը
Վազգէն Աբարդեան - Վատիկան
Ուրուկուէյի Ներկայացուցիչներու տան նախագահ Անա Օլիվերան, Ուրուկուէյի նախկին նախագահներ Խուլիօ Մարիա Սանկինեթթին եւ Լուիս Ալպերթօ Լաքաժէ Էռեռեան, 45 երեսփոխաններ եւ 4 ծերակուտականներ Ազրպէյճանին կոչ կ՛ուղղեն ազատ արձակելու բոլոր հայ պատերազմական գերիներն ու պատանդները:
Այս մասին կը հաղորդէ Ուրուկուէյի մէջ Հայաստանի դեսպանատունը` նշելով, որ ուրուկուէյցի քաղաքական գործիչները այդ մասին յայտարարութիւն հրապարակած են:
«Կ՛ողջունենք Հայաստանի եւ Ազրպէյճանի միջեւ յարաբերութիւններու կարգաւորման հոլովոյթին մէջ յառաջընթացը եւ կարեւոր կը նկատենք յարգանքը երկու երկիրներու տարածքային ամբողջականութեան նկատմամբ` միջազգայնօրէն ճանչցուած սահմաններուն համապատասխան, ինչպէս նաեւ` մարդասիրական խնդիրներու լուծումը: Այս ծիրին մէջ Ազրպէյճանին` ՄԱԿ-ի Կենսոլորտի փոփոխութեան տարեկան հեղինակաւոր խորհդաժողովը` ՔՈՓ29-ը հիւրընկալող երկրին կոչ կ՛ուղղենք` անյապաղ եւ անվերապահօրէն ազատ արձակելու բոլոր հայ պատերազմական գերիները եւ պատանդները` ատով իսկ ամրապնդելով երկու կողմերուն միջեւ վստահութիւնը հաշտեցման այս պատմական պահուն:
«Միեւնոյն ժամանակ, կ՛ընդգծենք ուժի կիրարկման անթոյլատրելիութիւնը եւ ռազմատենչ հռետորաբանութենէն ու ատելութեան խօսքէն զերծ մնալու կարեւորութիւնը` շրջանին մէջ կայուն խաղաղութեան հաստատման չխոչընդոտելու համար», կը նշուի յայտարարութեան մէջ:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
