Արցախի «Տատիկ եւ պապիկ» յուշակոթողը պղծուած
«Monument Watch» կազմակերպութիւնը ահազանգ հնչեցուցած է, հաղորդելով որ ատրպէյճանական թելեկրամեան ալիքները 9 Նոյեմբերին հրապարակած են «Մենք ենք, մեր սարերը» (Տատիկ-Պապիկ) յուշարձանէն տեսանիւթեր եւ լուսանկարներ։ Այդ լուսանկարներուն մէջ ակներեւ են յուշարձանին վրայ գրութիւններ, ատրպէյճանցիներու անուններ, մականուններ, հայերն ու Հայաստանը ծաղրող գրառումներ։ Վնասուած է յուշարձանի տարածքը։
Միաժամանակ նկատելի են նոր պնդումներ, ըստ որոնց «թէպէտ յուշարձանը կառուցուած է Խորհրդային տարիներուն Ատրպէյճանի գումարներով, սակայն ան դարձած է հայկական անջատողականութեան խորհրդանիշ, հետեւաբար պէտք է կազմաքանդուի»։
«Կրնանք հաւաստել, որ Պաքուի իշխանութիւնը կը խրախուսէ յուշարձանի քանդումին ուղղուած քննարկումները», կը նշէ վերոյիշեալ աղբիւրը։
Աղբիւրը՝ Արեւելք
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
