Սուրիական զինեալ ընդդիմութիւնը գրաւեց Համա քաղաքը

«Մայատին» արբանեակային պատկերասփիւռի կայանը հաղորդեց, որ հինգշաբթի արշալոյսին ընդդիմադիր զինեալ խմբաւորումներու Համայի հիւսիսային գիւղական շրջանի Զէյն Ապիտին լերան վրայ մեծ յարձակումը ձախողութեան մատնուած է, երբ անոնց մասնայատուկ ուժերը` ուզպեք Ապու Ռաֆիքի հիմնած, եգիպտացի Ապու Եաքթանի ղեկավարած եւ Սուրիոյ մէջ Քայիտայի թեւը եղող Ասայէպ Համրան ինկած է սուրիական բանակի լարած թակարդը:

Գիշերուընէ մինչեւ արշալոյս տեւած բուռն բախումներուն հիմամբ սուրիական բանակը յաջողած էր լեռը առնել իր ամբողջական վերահսկողութեան տակ:

Զէյն Ապիտին լեռը ռազմավարական նշանակութիւն ունի, որովհետեւ կը վերահսկէ Համա քաղաքին:

Համա քաղաքին շուրջ կռիւներուն վերաբերեալ հաղորդուեցան հակասական տեղեկութիւններ: Մինչ սուրիական զինեալ ընդդիմութիւնը պնդեց, որ սկսած է մուտք գործել քաղաք, իշխանամէտ աղբիւրներ պնդեցին, որ սուրիական բանակի դիրքերը անխախտ կը մնան:

Ըստ «Մայատին»-ի, սուրիական բանակը Համա քաղաքի շրջանին մէջ Սըլմիէ քաղաքէն 15 քիլոմեթր հեռաւորութեան վրայ բախում կ՛ունենայ զինեալներուն հետ եւ քաղաքի հիւսիսարեւմտեան կողմէն 4 քիլոմեթր հեռաւորութեան վրայ դէմ կը դնէ անոնց յարձակումներուն: Բուռն բախումներ տեղի կ՛ունենան նաեւ քաղաքի հիւսիսային կողմը գտնուող Քամհանէ գիւղին մերձակայքին մէջ:

Սակայն սուրիական զինեալ ընդդիմութեան զինուորական գործողութիւններու հրամանատար Ապու Մուհամետ Ժուլանի աւելի ուշ յայտարարեց, որ զինեալ խմբաւորումները սկսած են մուտք գործել Համա քաղաք` նշելով. «Համայի ներխուժումը վրիժառութիւն չի պարունակեր»:

Սուրիական զինեալ ընդդիմութեան զինուորական գործողութիւններու ղեկավարման բաժինէն հրամանատար մը «Արապի» պատկերասփիւռի կայանին յայտնած է, որ Համայի մէջ սուրիական վարչակարգի ամրութիւններու տապալումէն ետք այլեւս դէպի Սուրիոյ բոլոր քաղաքներ ճամբաները բաց են:

Երէկ երեկոյեան սուրիական զինեալ ընդդիմութիւնը Համա քաղաքը առաւ իր վերահսկողութեան տակ: Ըստ «Հատաս»-ի, «Թահրիր Շամ եւ զինեալ խմբաւորումները յայտնած են, որ Համայի բանտէն լիբանանցիներ ազատ արձակած են: «Արապիա» հաղորդեց, որ Հոմսի կարգ մը թաղամասերէն Թարթուսի ուղղութեամբ մեծաթիւ գաղթ սկսած է:

«Մայատին»-ի համաձայն, Հալէպի գիւղական շրջաններէն տեղահանուածներուն թիւը աւելի քան 2 միլիոն է, ինչ որ բնակչութեան 80 առ հարիւրն է: Հալէպի մէջ գտնուող դեղորայքի կարիքներուն աւելի քան 70 առ հարիւրը բաւարարող գործարաններէն շատերը դադրած են գործելէ:

Աղբիւրը՝ Ազդակ