Զայետ մրցանակի 2025ի դափնեկիրները՝ խաղաղութեան նոր պատուիրակներ եւ յոյս ստեղծողներ

Մարիամ Երեմեան - Վատիկան

2025 թուականի 4 Փետրուարին, Միացեալ Ազգերու կողմէ ճանչցուած Մարդկային Եղբայրութեան Միջազգային Օրը, Ապու Տապիի մէջ «Zayed Award for Human Fraternity - Մարդկային եղբայրութեան Զայետ մրցանակ»ի վեցերորդ հրատարակութեան ծիրէն ներս, կը կայանայ մրցանակի տուչութեան հանդիսաւոր արարողութիւնը։

2025 թուականի դափնեկիրները

Դափնեկիրներն են՝ Պարպատոսի վարչապետ Միա Մոթլին, 15ամեայ եթովպացի ամերիկացի գիւտարար Հեման Պեքելէն եւ «World Central Kitchen» կազմակերպութիւնը՝ կլիմայական փոփոխութիւններու վնասը սահմանափակելու, քաղցկեղի կանխարգելման ոլորտէն ներս գիտափորձերու, Կազայի բնակչութեանը մարդասիրական օգնութեան համար:

Միա Մոթլի

Միա Մոթլին մրցանակի արժանացած է որպէս Պարպատոսի վարչապետ կլիմայի փոփոխութեան ծիրէն ներս իր վճռական գործողութիւններու համար: 2022 թուականին անոր՝ «Bridgetown» նախաձեռնութիւնը, «հրատապ եւ վճռական գործողութիւններ իրականացնելու» կոչ էր։ Բացի այդ, ան պարտաւորութիւն ստանձնած է մինչեւ 2030 թուականը Երկիրը ամբողջութեամբ վերականգնուող ուժանիւթի հասցնելու։

«World Central Kitchen»

«World Central Kitchen» մարդասիրական կազմակերպութիւնը ճանչցուած է մարդասիրական ճգնաժամերէն տուժած համայնքներուն պարենային օգնութիւն տրամադրելու իր աշխատանքի համար: 2010 թուականին իր հիմնադրումէն ի վեր՝ կազմակերպութիւնը տրամադրած է աւելի քան 300 միլիոն սնունդ աշխարհի 30 երկիրներու մէջ, ներառեալ՝ 100 միլիոն սնունդ Կազայի պաղեստինցիներուն՝ 2023ի հոկտեմբերէն ի վեր։

Հեման Պեքելէ

Մեծ հետաքրքրութիւն կը ներկայացնէ 15ամեայ եթովպացի ամերիկացի Հեման Պեքելէի կերպարը։ Երիտասարդ գիւտարարը մշակած է էժան օճառ՝ վաղ փուլերու ատեն մաշկի քաղցկեղը կանխելու եւ բուժելու համար: Ներկայիս արտադրանքը փորձարկման փուլի մէջ է ԱՄՆ Ճոնս Հոփքինս Պլումպերկի հանրային առողջութեան դպրոցին մէջ:

Խաղաղութեան պատուիրակներ եւ յոյս ստեղծողներ

Մարդկային եղբայրութեան մրցանակը անկախ եւ ամէնամեայ միջազգային մրցանակ է, որուն Քննիչ յանձնաժողովի կազմը տարեցտարի կը փոփոխուի։ Անոր ընդհանուր քարտուղար Մոհամմատ Ապտելսալամի խօսքերով այս տարուայ դափնեկիրները «մարդկային եղբայրութեան նոր դեսպաններ» չեն միայն, այլեւ «խաղաղութեան նոր պատուիրակներ եւ յոյս ստեղծողներ, որոնց կարիքը մենք շատ ունինք»։

Նշենք թէ՝ ըլլայ Զայետ մրցանակի (Փետրուար 2019), ըլլայ Մարդկային եղբայրութեան Միջազգային Օրուայ (21 Դեկտեմբեր 2020) հիմնադրման համար հիմք հանդիսացած է Ապու Տապիի մէջ Ֆրանչիսկոս Պապին եւ Ալ Ազհարի աւագ Իմամ Ահմատ Ալ Թայըպի միջեւ պատմական հանդիպումը եւ անոնց միջեւ ստորագրուած «Մարդկային եղբայրութեան փաստաթուղթ»ը (Փետրուար 2019), որուն գլխաւոր նպատակն է մեղմացնել անհաւասարութիւնները եւ խթանել մարդկանց միջեւ իրական կապը։