Audience générale : Kosakola Nsango elamu na esengo, « mbuma ya Elimo"

Jean-René Bompolonga- Kinshasa  

Mokolo mwa lelo ya misato, Mosantu Papa na katekisi na ye tango ya audience générale, azongelaki likambo ya “mbuma ya molimo”, eye apostolu Polo alobaka na mokanda na ye moko, bipayi ya ba Galati: “bolingo, esengo, boboto, bolamu, loboko, ezaleli ya boboto mpe komipekisa”. Papa François asembolaki likambo moko ekeseni na ba charisme, eye Elimo apesaka na oyo ye alingi mpe na tango ye alingi mpo na bolamu ya Eklezia: “Ba mbuma ya Molimo bizali mbano ya mosala kati na ngolu mpe bonsomi”. Bikoloba tango inso “bosaleli ya moto, epayi ya nani ‘boyambi ekotambola na bokabi” (Ga:5,6), tango mosusu na ndenge ya kokamwisa mpe ya esengo.

• “Na kati ya Eklezia, moto nyoso akoki kozala apostolu, prophèta, moteyi te, kasi moto nyoso eponi te akoki kozala moto ya bolingo makasi, motema molayi, komikitisa, moto oyo alukaka boboto mpe bongo na bongo”.

Na bokobi, Papa alingaki kobeta sete na “esengo”, mbuma ya Elimo, eye ezali “kosangisa bisengo binso ya bomoto na mayoki binso ya kokokisama mpe ya bokokisi, oyo ekolingisa tè ewumela mpo na libela”. Mbela ya Mosantu Polo (Ph. 4, 4-5) na bandimi ya Ekelzia ya Philippes (na engumba ya Macedoine) “ya kozala tango inso na esengo ya Mokonzi”, ekolobama lelo lisusu na mokritstu nyoso. Liloba “Evangile” elingi koloba nsango elamu. Na yango, elobaki papa François, “osengeli te kosakola na masusa mpe elongi ya mawa, kasi na esengo ya oyo azui eloko ya motuya ebombanaki mpe liyaka ya motuya monene”.

Mosantu Philippe Néri, “moteyi ya nsango elamu ya esengo”

Eleki mikama mitano, azalaki kovanda na Roma, moto moko abengamaki na kombo ya Philippe Neri. Akotaka na lisolo lokola mosantu ya esengo, elobaki Papa. Na bana ya babola mpe babuakama o esika azalaki koteya, azalaka koloba: “Bana na ngai, bozala na esengo, nalingi te bozala na ba soucis atako mawa, esengeli na ngai kaka bosala lisumu te”. To lisusu, “Bozala malamu, soki bokokoka”, “Moteyi ya nsango elamu ya solo na esengo”, mosantu philippe Neri “azalaka na bolingo makasi mpo na Nzambe esalaka lokola tango mosusu ete motema na ye epanzana na kati ya tolo na ye. Esengo na ye ezalaki na bolobeli enene, mbuma ya Elimo”, elobaki mosantu Papa.

Esengo ya Nsango Elamu

François ayebisaki lisusu ete “esengo ya Nsango Elamu etondisaka motema mpe bomoyi mobimba ya baye bakutani na Yezu  Ba oyo bamitikaka Ye abikisa bango bakangolami na lisumu, na mawa, na eloko te kati na bango, na komibombana. Na Yezu Kristu esengo ebotami mpe ekobotama tango inso”. (Exhortation apostolique Evangelii gaudium). Na bokeseni na esengo nyoso esusu, ekoki “kozonga ya sika mikolo minso mpe ekoma ya kopanzana”. “Kaka likolo na bokutani ena -to mpe bokutani ya sika- na bolingo ya Nzambe, eye ekobonguama na bolingani ya esengo, nde tobikisami na koyeba na biso ebombana mpe komimonisa yo moko /. /Kuna ezali liziba ya mosala ya bopanzi nsango elamu”, elimbolaki Papa. Soki moto moko ayambi bolingo ena eye ekozongisela esengo ya bomoyi, lolenge nini akoki kokanga mposa ya koloba na basusu?”, etunaki ye.

“Ezaleli mibale ya esengo, mbuma ya molimo, kaka ebebisami na tango molayi te, kasi ezali kokola mingi na bokaboli masolo na basusu”, elobaki François, na bosemboli ete “na Yesu tozali na kimia mpe esengo”. Mpe alobi lisusu ete “nyoso awa na nse ekoleka mbangu: kielenge, bokolongonu, makasi, bomoyi ya malamu, bolingani, bolingo…Kasi, ebakisaki Papa, atako biloko bina bikoleka mbangu te, sima ya mwa ngonga bikokoka lisusu te, kutu bikobanda kotungisa”.