Audience générale : Papa akebisi mpo na mosala ya bana

Jean-René Bompolonga- Kinshasa

“Oyo akoyamba bokonzi ya Nzambe lokola mwana te akokota kuna te”. Na bomanyoli liloba eye ya Nsango Elamu ya Santu Luka, Santu Papa aponi kotombela malongi na ye ya mbula na bana, o eleko ya audience générale na ndako ya makita Polo ya motoba, mokolo ya misato ya mwambi ya sanza ya liboso. Papa, na mokano ya organisme curial moko ya sika etali bobateli bomwana, akebisi mingi na mabe ya mosala ya bana. François ayoki mawa na ndenge mabe ena ezali kokoba, elongobani te o eleko eye “tozali kotala ba planètes misusu to ba mondes virtuels”.

Bomwana ya mawa, ekonyokwama na mosala mpe ekozoka

“Tozali na mpasi ya kotala na miso mwana moko batie ye pembeni, akonyokwama na mosala, bakobeta te”, azongelaki Papa, na koloba lolenge nini na “ekeke eye eboti intelligence artificielle mpe ekobongisa bovandi na ba planètes ebele nanu ezui meko ya mabe ya bomwana ayokisami nsoni, ekonyokwama na mosala, akozoka kino na liwa”. Na poso misato, lisolo moko nanu esalema te ekotala lotomo ya bana ekosalema na Vatican, na likanisi mokonzi “Tolinga bango mpe tobatela bango”.        

Mokitani ya Petelo asembolaki liloba na ye na Likomi Esantu, na bolobi lisusu ete bana bazali likabo ya Nzambe mpe balingami mingi na Tata. Mpe François akokanisa lelo na motango ya bana baye “bakokufa na nzala mpe na bozangi” to “bakopaswama na ba bombes”, na elili, kala, ya mobulu ya Hérode epayi ya bana ya Béthléem. Lisanga Save The Children atangi bongo bana milio 473 bazali kokola lelo bisika bitumba bizali. Mpo na François, ezali likama moko mozindo eye ekozonga na ba lolenge misusu na lisapo.

Kokebisa mpe kokweisa mobulu

Na bolakisi bana lokola ndakisa mpo na mikolo, Yezu asukisi likanisi eye emonaka mwana lokola eloko moko ya ntina te, akolendisa mpo na kotika bana baya epayi na ye. “Bopekisa bango te, pamba tè bokonzi bwa Nzambe ezali na baye bakokani na bango”     

Na bongo Papa alobi “bayekoli ya Yezu Kristu basengelaki te kopesa ndingisa ete bana bazala pembeni to banyokwama, bazanga makoki na bango, balinga to babatela bango te”. “Bakristu bazali na lotomo ya kokebisa makasi mpe ya kokweisa mobulu to mabe epayi ya bana”. Papa abandisaki mibu mitano bileki ya Bokutani mpo etali bobateli ya bana oyo, na sanza ya mibale ya mobu nkoto mibale na zomi na libwa, epesaki makasi ya sika na etumba ya Eklezia katoliko na mbemba bisalemaki na basango.     

Mosala ya bana   

Mpe François alobi mingi lisusu na oyo etali motango ebele ya bana bazali kotinda bango na makasi basala mosala. “Mwana oyo akoseka te mpe akolota te akokoka koyeba mpe kokolisa makoki na ye te”, elobaki ye, na bokanisi bana “bakonyokwama na nkita oyo ekotosa bomoi te”, “nkita eye, na lolenge ekosalema, ekozikisa ebombelo monene ya biso ya elikya mpe ya bolingo”. Unicef ekomona ete bana milio nkoto moko na ntuku motoba na mokili batindami na makasi na mosala. Papa, oyo atombeli likanisi na ye ya losambo ya sanza ya liboso na boteyi ya bana, akebisi na nsuka ete “oyo akosala mabe na mwana moko esengeli kotatola yango liboso ya bato”