« Ba crèches 100 na Vatican », mbala ya 7 ya exposition etali likambo ya elikya
Bizali bongo misala 125 biwuti na bikolo ya Poto mpe ya mokili mobimba biye bikotiama na nse ya Colonnade ya esika Santu Petelo. Mokolo ya 24 ya sanza ya zomi na mibale ekoya, liboso ya kobanda Mbula Esantu, bofungoli ekosalema liboso ya Mgr Fisichella, bato basusu ya dicastère mpo ya Bopanzi nsango elamu mpe na batindami ya commune ya Roma. Exposition ekofungwama kino mokolo ya 6 ya sanza ya liboso ya 2025.
Jean-René Bompolonga- Kinshasa
Exposition ya mokili mobimba ya mbala ya 7 « 100 crèches na Vatican » ekofungwama mwa mikolo liboso ya Jubilé 2025. Exposition ena esangisi misala ya ba artistes ya mokili mobimba baye balekisi bokeli na bango na bolakisi bilili ya Mbotama. Ebele ya misala bakolakisa bibotami na likambo etali “Elikya eye ekosaka te”, ewuti na titre ya bulle d’indiction ya Mbula esantu.
Bofungoli na nse ya Colonnade ya Santu- Petelo
Ezali mpo na bato banso, bofungoli ya exposition ekosalema mokolo ya eyenga 8 ya sanza ya zomi na mibale na 16h na nse ya Colonnade ya loboko ya mwasi ya Bernin, esika ya Santu- Petelo na Roma. Esika ena ekopesa ba crèches, misala ya solo ya ntoki, na nzinganzinga eye ekobenga bato ebele baya kotala elili ya kala ya Mbotama ya Yezu mpe ya kobongisa motema na bango mpo na ebandeli ya Jubilé ya 24 ya sanza ya zomi na mibale ya 2024. Exposition ekofungwama na Mgr Rino Fisichella, pro-préfet ya discatère ya Bopanzi nsango elamu mpe mokambi ya milulu ya Jubilé, akozala na bato basusu ya discatère, mpe na motindmai moko ya commune ya Roma. Molulu ekoyembana na concert moko ya nzembo ya Noël ebongisami na chorale ya Eteyelo ya France ya miziki Chateaubriand ya Roma, mpe na fanfare ya corps ya gendarmerie ya leta ya Cité ya Vatican, eye ekozala na likambo na mwa banzembo.
125 berceaux ya Poto mpe ya mokili
Mbula eye, 125 crèches bikotandama, biwuti na mikili kilikili ya Poto, lokola France, Santu-Marin, Croatie, Pologne, Allemagne, Hongrie, République tchèque, Slovaquie, Slovénie mpe Espagne, mpe bikolo bisusu ya mokili lokola Amerika, Costa Rica, Venezuela, Brésil, Mali, Japon, Philippines, Taïwan mpe Paraguay. Mingi ya bikolo bina bizali na bantoma na bango na Vatican, baye bazuaki mokano ya kotombola likambo wana na bikolo na bango. Ezali bongo bantoma ya France, Santu Marin, Croatie, Pologne, Hongrie, Slovaquie, Slovénie, Taïwan mpe Paraguay.
Ba crèches bikopesa na bokuse makanisi ya ba artistes baye basali mango na bisaleli bikeseni, lokola lokasa ya Japon, soie, résine, polystyrène, laine, fibre ya coco, ya etabe mpe ya verre. Na kati ya biloko biwuti mokili mobimba, ezali na “Maswa ya jubilé”, crèche esalemi na bayemi ya lisanga “Citta dei Presepi” “Cité des crèches” ya Florence, eye ezongeli symbolique ya logo ya Jubilé. Ezali mpe na crèche ya cathédrale Santu-Maria ya Osaka, etandami na eleko ya collaboration mpo na présence ya pavillon ya Vatican na Expo Osaka 2025, ebongisami na biloko mpenza ya Japon lokola lokasa ya Japon, kimonos ya soie mpe tatamis. Toloba mpe crèche ya sanctuaire ya Kristu Rédempteur, ya Rio de Janeiro, esalemi na biloko biwuti na mboka, mingi mpenza ba fibres ya coco mpe ya etabe. Crèche ya style napolitain, esalemi na libaya mpe mposo ya nzete na etuka ya Caserte ya Union ya Italie ya bato bakufa miso, ekozala lokola.
Bofungoli kino 6 ya sanza ya liboso ya 2025
Exposition ekofungwama kobanda 8 ya sanza ya zomi na mibale na 16h kino mokolo ya yambo ya sanza ya liboso ya 2025 na 19h30. Mpo na kokota, eleko inso ya exposition, ekozala ofele mpe na réservation te. Exposition ekosalema mikolo nyoso, kobanda 10h kino 19h30, longola mikolo ya 24 mpe ya 31 ya sanza ya zomi na mibale, eleko molulu ekosuka na 17h. Bokoti ya suka ekosalema ba minutes 15 liboso ya kokanga. Ba volontaires ya discastère mpo na Bopanzi nsango elamu bakozala wana tango inso ya exposition mpo na bosungi bato na koyamba bango.
05 December 2024, 15:59
