Episkopo ya lokumu Krajewski nzeneneke ya bomoko ya Eklezia na botali etumba

Jean-René Bompolonga- Kinshasa

Ezalaki Mbotama ya makila na Ukraine, eye elamukaki mokolo ya misato na nse ya etumba monene ya Russie. Lokola elobi ministère ya Defense na Moscou, basalelaki mandoki ya précision koleka ekokendeke mosika mpe ba drones mpo na kotuta mingi mpenza bisika biye bizali na lotiliki ya ekolo.

Etumba monene na Kharkiv

Etuka ya Kharkiv, na nordi-esti ya ekolo, ezuaki masasi mingi mpenza, bato misato bazokaki, lolenge mokambi ya etuka alobi. Ihor Terekhov, na nzela ya nsango epayi ya Telegram. Kherson, na sudi, yango lokola ezuaki masasi, lolenge bakonzi ya etuka balobi, moto moko azokaki. Na nsango na nzela ya médias sociaux, mokonzi ya Ukraine, Volodymyr Zelensky, abengi yango etumba ezangi bomoto.

Bisaleli ya lotiliki bibebi

Episkopo ya lokumu aumônier Konrad Krajewski, oyo azali na Ukraine mikolo miye mpo na komema lisungi ya Papa François na bana mboka baye batungisami pembeni ya mbula misato ya etumba, alobaki mawa na ye mpo na oyo ezali koleka, lolenge bapanzi nsango ya Vatican balobi.

“Maloba bizangi ngai, elobi episkopo ya lokumu. Na ntongo ya lelo na ngonga ya motoba, mokolo ya Mbotama, Kharkiv ezuaki ba bombe, misato likolo ya minei ya bato ya etuka -bato wana bazali milio moko- bazangi lotiliki. Ba russes bakweyisaki ba bombe esika eye bisaleli ya lotiliki ezalaka. Bato bazoki bazali”.

Esengo ya bana mboka mpo na penepene ya Papa

Episkopo ya lokumu Krajewski alimbolaki lisusu ete alongwaki Kharkiv na “ngonga ya ntuku mibale na mibale mpe minute ntuku minei na mitano, minute zomi na mitano liboso ya couvre-feu, na engbunduka eye ebombanaki moke, mingi mpenza mpo na kozala polele te, na mananisa nyonso ya kokangama”. Nsango y’attentat ekomelaki ye nsima moke, na nsima ya bolongwi. “Ezalaki ngonga mwa moke, nazalaki kuna mpe nazalaki kosambela na bato bazalaki kopesa matondi mpo na ba générateurs maye Papa mpe bandimi ya Roma bapesaki. Bizali kosunga mingi, ba températures bizali na nse ya libungutulu mpe ba générateurs bikosalisa mingi mpo na kobikisa ba bomoi mpe ya kokoka kovanda na ndako”.

Makasi ya losambo na Eklezia eye ezali na bomoko

Atako molili mpe bolembu bowuti na etumba, episkopo ya lokumu aumônier abeti nsete na likambo moko mpenza: “Esengo nini ya komona Eklezia ezali na bomoko”, elimboli ye. “Ezali ntango mosusu elembo makasi mpo na biso, mpo na biso banso: kosambela lisanga, kozala bomoko lokola Kristu alingaka yango ntango inso”. “Ntango tozali lisanga, tozali makasi koleka, mpe yango emonani mingi na Kharkiv”, esukisaki ye.