RDC: Mokonzi Tshisekedi afungoli hub ya entrepreneuriat

Jean-René Bompolonga, Kinshasa/Congo

Ezuami na esika ya 32 000 m² na kati ya Kinshasa kobanda 2020, “Silikin Village” ezali hub ya monene koleka na kati ya Congo/Kinshasa ezali ya lingomba Texaf Digital, kompany yoko ya Euronext, evandi na Bruxelles, na Belgica. Ebongisami mpo na likambo ya sika mpe ya botomboli nkita, likambo eye lingomba Texaf esali etiami na kati ya mposa ya bulamatari ya ekolo mpo na kokitisa mwa muke bokabwani na oyo etali Internet mpe ya kotia liye etali tekiniki lokola masini ya botomboli mpo na libela, ndenge Plan National du Numérique ezali kosenga.    

Silikin Village, bosangisi bato ya mayele ya Congo mpe ya mikili misusu

Silikin Village ebotami na mposa ya bulamatari ya Congo mpo na kokitisa bozangi misala na nzela ya botomboli mayele, na bosungi nzinga-nzinga epayi wapi misala -ya bana mboka lokola ya bana y’Afrika- bakoki kozua bomengo. Na bolobeli kompany na ye, mokonzi ya Silikin Village mpe mokambi ya lingomba Texaf, Gérald Croonenberghs, alobaki ete Silikin, koleka coworking, ekozala esika ya kotombola, kosangisa bato ya mayele ya Congo mpe mikili misusu. Mokambi ya Postes mpe Télécommunications, Nouvelles Technologies de l’Information et de la Communication, Augustin Kibasa, oyo azalaki na tango ya bofungoli, ayebisi lisusu ete moko ya mposa makasi ya ekolo na eleko eye ezali ya kosala likambo ya Internet esika ya kosangisa mpo ya kotombola nkita, bokambi elamu mpe ya botomboli bomoyi ya bato.

Basangani na bofungwami ya Silikin Village, mokolo mwa zomi ya sanza ya zomi o mobu 2024, na Kinshasa

Manaka mpo ya bosungi bilenge

“Kokola mpe kokolisa”, ezali liloba ya motuya eponami na Silikin Village, na botali makambo mibale, kosunga baye bazali na ba kompany ya malonga na ekolo mpe kopesa makoki na bilenge, na liye litali ba kompany ya Internet mpe ya intelligence artificielle. Mpo na ntina wana motindami ya Banque mondiale na Kinshasa, oyo azalaki na molulu ya bofungoli, akokanisi Silikin Village na Silicon Valley ya ekolo y”America. Mpo na motindami ya Banque mondiale, likambo ya sika ena ekolakosa bomoko epayi wapi Internet ezali kosala misala mpo na bilenge, mpo ya bokomi moko ya bisika ya ntina na sudi ya Sahara. Na esika ya boyoki, bilenge mitano batatoli mpo ya bomipesi na bango na Silikin Village na oyo etali manaka mpo ya botomboli mayele mpe lolenge ya kokamba.

Bofungwami ya Silikin Village, mokolo mwa zomi ya sanza ya zomi o mobu 2024, na Kinshasa

Mbongwama, likambo la sika mpe soft landing

Mposa ya Silikin village ezali ya “bokomi eloko ya ntina na kati ya bingumba na oyo etali bosungi ba kompany”. Mpo na kokokisa yango, makambo misato ya minene bazali kolanda: kotambola elongo mpe kopesa makoki na oyo etali likambo ya mosala ya ekolo mpe mikili misusu na nzela ya manaka ya kobimisa mpe botambuisi mbango; lisungi makasi na misala ya mbongwama, mingi mpenza na maye matali cleantech, fintech, edtech, agritech, na botali lolenge kokotisa biyano biwuti na intelligence artificielle; na botamboli elongo mobimba na ba kompany ya mikili misusu, na bosalisi bango mpo ya bokoti na makambo ya mombongo ya ekolo Congo mpe  ya bosungi botombwami na bango.