Na Somaliland, opposition alongi maponami ya bokonzi ya ekolo
Abdirahman Mohamed Abdullahi alongi maponami ya bokonzi ya ekolo ya 13 ya sanza ya zomi na moko elekaki. Mokonzi ya parti Waddani azui 63,92% ya voix, aleki oyo azalaki mokambi ya ekolo Muse Bihi Abdi, oyo azui 34,81%. Mbano ena ezali bongo kosala mbongwana enene ya politiki ya etuka eye ya Somalie emipesa bonsomi.
Jean-René Bompolonga- Kinshasa
Campagne ya maponami elekaki mingi mpenza na masolo makasi na maye matali nkita, démocratie, bituka, na mpe oyo motuna ezyu ntango molayi mpo na bondimami ya etuka ena ya Somaliland na mokili mobimba. Protocole d’accord esalemaki na Ethiopia na bokonzi boleki ezalaki bongo eloko ezuaki ba critiques ebele. Accord ena ebongisaki bopesi na Ethiopia nzela ya kokoma na ebale mpo ekolo ezua bondimami ya bonsomi ya Somaliland, kasi likambo ena eboyamaki makasi na gouvernement fédéral ya Somalie eye amonaki yango lokola bokati mabele ya ekolo. Likambo wana ebota mindondo kaka na etuka ena te, kasi mpe na Corne y’Afrika mobimba.
Mposa ya mbongwama mpo na kozala na kimia na politiki
Bopesi bokonzi ekosalema na eleko moko ya matata, atako etumba mpo na Las Anod esilaki. Mindondo epayi wana, maye bikotisi Puntland, etuka ekokambema yango moko na nordi-esti ya Somalie, bibimisi bolembu ya boyokani o kati mpe o libanda ya Somaliland. Bulamatari eye eleki etiolami mingi mpo na lolenge asali mpo na likambo yango mpe bana mboka babimisi mposa na bango ya mbongwana na politiki. Atako mwa mikakatano bizalaki na maponami, mokili epesi longonya mpo na maponami mingi mpo na lolenge makambo maleki polele mpe na sembo. Ntina ya baye baponaki, na boleki milio moko ya baponi, elakisi bomipesi ya bato ya Somaliland mpo na bokolisi démocratie.
Somliland azali koluka andimama na mokili
Abdirahman Mohamed Abdullahi, azali moto ayebi politiki oyo abandi yango na mobu 2002 mpe azalaka mokambi ya Chambre pembeni ya mbula 12, azali lelo kokutana na mikakatano ya makasi. Mikakatano yango bizali bongo na kati wana masala ya boyokani na Ethiopia mpe Somalia, mpe ya bokolisi lisolo na Mogadiscio. Boluki ya Somaliland ya kondimama na mokili etikali likambo ya liboso, kasi mpasi mpo na kokoma wana na bosali consensus régional et mondial te. Bongo, liponami ya Abdirahman Mohamed Abdullahi ekolakisa ebandeli ya makambo ya sika mpo na Somaliland, ekomema na yango elikya ya kozala na kimia na politiki, ya botomboli nkita makasi mpe ya bomipesi lisusu mpo na boboto. Kasi, etikali koyeba lolenge nini bakambi ya sika bakosala mpo na kosilisa mikakatano na Las Anod. Makoki ya mokonzi ya sika ya kokolisa lisolo mpe ya boluki ndenge ya kosilisa mikakatano na baye banso bazali o likambo na Somalie bikozala matata mpo na lobi ya Somaliland, mingi na maye matali kimia o kati ya etuka mpe ya bokolisi ba institutions ya démocratie.
27 November 2024, 16:01
