Joe Biden abongoli etumbu ya liwa ya bato 37 n’Amerika

Jean-René Bompolonga- Kinshasa

Losambo ya Papa ekokisami. Bato ntuku misato na sambo mibali mpe basi baye bazuaki etumbu ya liwa n’Amerika bakomona etumbu na bango ya liwa ebongwana na boloko ya libela. Wana ezali nsakola ya mokonzi y’Amerika mokolo ya ntuku mibale na misato, liboso ya Mbotama mpe ya bofungoli Jubilé. Nsango ya Ndako Pembe (Maison blanche) esemboli ete bato wana bakomona etumbu na bango ekoma ya boloko ya libela eye bakoki kosenga kobima mokolo moko te.

Nsango ya Ndako Pembe

Nsango ena, eye elobi ete Joe Biden “akolikia ete Amerika esengeli kotika kosalela etumbu ya liwa na niveau fédéral, longola kaka makambo ya terrorisme mpe ya bobomi bato ebele biwuti na likunya”, elimboli ete “mokano ena ya bolimbisi ezui makasi na bilan ya mokonzi na oyo etali bobongisi bosembo ya etumbu”. Kobanda sanza ya zomi na mibale, Joe Biden alobaka bobongwami ya etumbu mpo  na nkoto moko na nkama mitano ya bana y’Amerika baye “balakisi elonga ya mbongwana na bango mpe mposa ya kokomisa masanga na bango kimia koleka”. Ntuku misato na libwa ya bolongoli etumbu bipesamaki na bato baye bazuaki bitumbu mpo  na ba makambo ya mobulu te.  

Mbela ya François o eleko y’Angelus

Mokano ya mokonzi y’Amerika, na mwa mikolo mike ya nsuka ya bokonzi na ye, elandi mbela makasi ya Papa o eleko y’Angelus ya Mbotama ezanga Mbemba, mokolo ya mwambi ya sanza ya zomi na mibale moleki. Na bolobi na bandimi basanganaki o esika Santu-Petelo, Mosantu Papa asengaki na bango “kosambela mpo ba bakangami baye bazali na nzela ya liwa n’Amerika ». « Tosambela mpo ete etumbu na bango ebongwana. Tokanisa bandeko na biso ya mibale mpe ya basi mpe tosenga na Mokonzi ngolu ya kobikisa bango na liwa ».

Bomipesi ya ba epsikopo na ba masanga

Maloba ya François -oyo ntango inso aboyaka kondima etumbu ya liwa kino kosenga kutu kobalola Katekisimo ya Eklezia katoliko na likambo ena- bizuamaki mpe bilobamaki noki noki na Lisanga ya ba episkopo katoliko y’Amerika, eye ebengaki bandimi banso y’Amerika basangana mpo  na kosenga na mokonzi Biden ya kobongola na bitumbu ya boloko ya libela bitumbu ya liwa ya bakangami bazui bitumbu ya liwa na ba boloko na niveau fédéral.

Liboso ya ba episkopo, Catholic Mobilizing Network (Cmn), lisanga moko ya katoliko y’Amerika eye ekobunda mpo  na bolongoli etumbu ya liwa n’Amerika, asalaki campagne mpo  na mbongwana ya bitumbu ya bato ntuku minei. Mokambi Krisanne Vaillancourt Murph asembolaki ete ezalaki eleko moko mpe ya suka ya mokonzi Biden ya koyamba liteya ya katoliko mpe ya kobikisa bomoyi ya bato wana. Makelele ya bomipesi ya lisanga ena ekomaki epayi ya Papa, eye apanzi yango na mokili mobimba.