വിശുദ്ധ വത്സരം പ്രത്യാശയുടെ വർഷമാകട്ടെ, കർദ്ദിനാൾ പരോളിൻ!

ജോയി കരിവേലി, വത്തിക്കാൻ സിറ്റി

വത്തിക്കാൻറെ ബാലരോഗാശുപത്രിയായ, ഉണ്ണിയേശുവിൻറെ നാമത്തിൽ റോമിലുള്ള “ബംബീനൊ ജെസു” ആതുരാലയം പ്രത്യാശയുടെ ഇടമാണെന്ന് വത്തിക്കാൻ സംസ്ഥാനകാര്യദർശി കർദ്ദിനാൾ പീയെത്രൊ പരോളിൻ.

വെള്ളിയാഴ്ച (20/12/24) ഈ ആശുപത്രി സന്ദർശിച്ച അദ്ദേഹം അവിടെ ചികിത്സയിൽ കഴിയുന്ന കുട്ടികൾക്കും അവരുടെ മാതാപിതാക്കൾക്കും കുഞ്ഞുങ്ങളെ ചികിത്സിക്കുന്നവർക്കും ഫ്രാൻസീസ് പാപ്പായുടെ തിരുപ്പിറവിത്തിരുന്നാൾ ആശംസകൾ കൈമാറുകയായിരുന്നു.

ഡിംസബർ 24-ന് വത്തിക്കാനിൽ വിശുദ്ധ പത്രോസിൻറെ ബസിലിക്കയിൽ പാപ്പാ വിശുദ്ധ വാതിൽ തുറന്നുകൊണ്ട് ജൂബിലിവർഷത്തിന് തുടക്കം കുറിക്കുന്നതിനെക്കുറിച്ചു സൂചിപ്പിച്ചുകൊണ്ട്, കർദ്ദിനാൾ പരോളിൻ, ഈ ജൂബിലി വർഷം, ഇപ്പോൾത്തന്നെ പ്രത്യാശയുടെ ഇടമായ “ബംബീനൊ ജെസു” ആശുപത്രിയിൽ പ്രത്യാശയുടെ കാലമായിരിക്കട്ടെയെന്ന് ആശംസിച്ചു. ആരോഗ്യം മെച്ചപ്പെടുകയും സാധാരണ ജീവിതത്തിലേക്ക് കടക്കുകയും ചെയ്യാമെന്ന പ്രത്യാശയാണ് ഇതെന്നും യേശു നമ്മെ നിരാശപ്പെടുത്തില്ലെന്നും അദ്ദേഹം പറഞ്ഞു.