Hebdomada Papae: o boletim em latim de 31 de agosto

“HEBDOMADA PAPAE”
Notitiae Vaticanae Latine redditae
Die tricesimo primo mensis Augusti anno bis millesimo undevicesimo

(TITOLI)

Éxstat océanus abscónditus boni qui dat spem in mundo pacis: sic ait Póntifex de diálogo interreligioso.

Papa Franciscus in oratione “Ángelus Domini” effátur: Paradísus non ad páucos destinátur, at ad eum obtinéndum non datur autocinética via.

In Sinis primi duo Epíscopi cum Mandato Pontificio consecrati sunt.

Ómnibus vobis audiéntibus salútem imo ex corde dicit Catharina Agorelius quae hanc editiónem nuntiórum Latina lingua prolatórum cónfert.

(Reportagem)

Póntifex gratulátur pro cóndito Comitatu superiore ad propósita persequénda quae continéntur in Documento de Fraternitate Humana pro pace mundiali communíque convictu, superiore mense Februario in Emirátibus Arábicis Unítis a Papa Francisco et a Magno Imam de Al-Azhar subscripto. Réfert nobis Rosarius Tronnolone:

“Étsi proh dolor malum, odium, divisio efferúntur, éxstat vero océanus abscónditus boni qui crescit quique diálogi nos in spem impéllit”. Sunt verba Papae Francisci, a moderatóre Offícii Communicationis Sanctae Sedis Matthǽo Bruni relata, respiciéntia nuper cónditum Comitátum superiorem ad propósita consequénda quae in Documento de Fraternitate Humana continéntur. Hunc per nuntium, Papa apérte dicit quomodo “cognítio mútua” ádiuvet ad “aedificándum, una cum fidélibus aliárum religiónum atque ómnibus viris mulieribúsque bonae voluntatis, mundum fraternitátis ac pacis”. Franciscus gratias agit Emirátibus Arábicis Unítis quod pro fraternitáte humána re operántur et exóptat ut incépta simília in mundo augéri póssint”.

Ante oratiónem Mariánam “Ángelus Domini” die domínico, vicésimo quinto mensis Augusti in Foro Sancti Petri, Papa interpretátus est locum Evangelii secundum Lucam in quo dícitur Iesum ad destináta procédere, scílicet “mori in cruce pro salúte ómnium hóminum”. Agit Aeliana Astorri:

Ad interrogatiónem: “Dómine, páuci sunt, qui salvántur?”, Iesus respóndet portam esse angústam ad Paradísum obtinéndum, atque Póntifex explicávit viam ad vitam aeternam non esse “pulchram viam autocinéticam”, quam “magna porta” finit, sed “ut salus obtineátur, opórtet Deum atque próximum amáre, et hoc haud est cómmodum. Dominus agnóscet nos non secundum nostros títulos”, líquido áddit Papa Franciscus, sed “secundum vitam humilem, vitam bonam, vitam fidei quae in opéribus revelátur”, atque invítat omnes ad sequéndum exémplum Maríae Virginis, quae “intrávit per angústam portam quae Iesus est”.

(Notícias)

In fine orationis marianae superiore die dominico, Papa fírmiter omnes cómpulit ad coërcénda incéndia in Amazónia. “Oremus – ait – ut, omnium opera ac studio, celeriter exstinguántur. Pulmo útique ille silvárum pro terrarum orbe vitális est.

In Sinis consecrati sunt primi Episcopi cum Mandáto Pontificio, secundum Pactum Provisorium inter Sanctam Sedem et Rempublicam Popularem Sinarum, subscríptum Pekíno die vicésimo secundo mensis Septembris anno bis millesimo duodevicésimo.

Mórtuus est cardinális Achílles Silvestrini, nonaginta quinque annos natus. Purpuratus, Praefectus emeritus Congregationis pro Ecclesiis Orientálibus ac sígnifer magnae traditionis diplomaticae Vaticanae.

Finis fit huius editionis, conveniémus iterum hebdomada proxima.