Hebdomada Papae: o noticiário em latim deste final de semana

“HEBDOMADA PAPAE”

Notitiae Vaticanae Latine redditae

Die vicésimo quarto mensis Augusti anno bis millésimo undevicésimo

Papa Franciscus in Audientia Generali: satis est de christianis falsis, vera conversio ad sácculum pérvenit.

Introductio Papae in volúmine de Mótibus Populáribus: sunt, dicit, pretiosa elementa participationis socialis.

In Australia, Iúdices Collegii Supremi Victoriae confírmant condemnationem Cardinalis Pell.

Salútem ex ánimo ómnibus vobis dicit Alexander De Carolis, audiéntibus novos núntios latína língua prolátos.

(Reportagens)

Christianus verus ille est cuius cor non adhaéret propriis negotiis, sed amat gratúite bona cum aliis commúnicans. Affirmavit Summus Póntifex in Audientia Generali diei Mercurii praetériti in Aula Pauli VI (sexti). Singularia refert Eugenius Murrali:

«Amor est modus. Sed non amor notionis, non amor fictus»: erat «amor óperum, iuváminis recíproci». Agitur de catechesi ardenti, cum intimis persuasionibus propósita, quam Papa in Audientia Generali praébuit. Consideratio Francisci, meditationes prosequentis de áctibus Apostolorum, in lucem posuit notionem «íntegrae communionis» quae primam christianam animavit communítatem. «Vera conversio», adfirmat Papa, «ad sácculum» pérvenit, quia cor a Deo vere tactum «generosum est cum omnibus» et «infirmíssimos ádiuvat». Ille christianus qui movetur proprium bonum quaerens, in Ecclesia véluti «peregrinus catacumbarum» movetur. Communio, conclúdit, sibi vult «meum tempus cum aliis communicare, ad illos iuvandos qui auxilio égent».

Proximo mense Septembri publici iuris fit volumen Librariae Editrícis Vaticanae cui titulus «Irruptio Motuum Popularium: Rerum Novarum nostrae aetatis”. Summus Pontifex introductionem in volumine scripsit. De hac re lóquitur Monia Parente:

Multiplícitas motuum popularium et consociationum quae operam dant iustitiae sociali promovendae, constítuit «clamationem de profundis, signum, cui contradícitur», spem quae «omnia mutare potest». Non est longa introductio, illa Francisci, in volumine de motibus popularibus. Notiones sunt tamen efficaces. In mutatione hodierna, quae timore et razismo definítur, motus populares sunt pro Papa véluti « fons virtutis moralis, ad novam vim dandam nostris civitátibus populáribus». Sunt, conclúdit, signum «novi humanismi» qui potest finem «ignorantiae compassionis» pónere.

(News)

Papa Franciscus praetéritis diebus epístulam scripsit ad salutandum adventum Navis Valetudinarii quae suum accepit nomen, in urbe Belemensi de Parà, in septentrionali regione Brasiliae. ágitur omnino de íntegro valetudinario fluviali quod curas praebet, aegrotos récipit et praeventiones offert septem centum milia incolis prope flumen vulgo Rio Amazoniae, verbum etiam Dei illis ádferens.

Iúdices Collegii Supremi Victoriae, in Australia, die Mercurii preaterito condemnationem confirmavérunt Cardinalis Georgii Pell quae réddita est nota mense Februario in processu primi gradus de abúsibus sexuálibus super minores. In exspectatione recursus, qui fíeri potest, Sedes Vaticana Diurnariis Edocendis íterum manifestavit propinquitatem Sanctae Sedis erga víctimas abúsuum sexualium et opus persequendi clericos qui istorum sunt rei.

Finis fit huius editiónis, grátias ágimus de auscultatióne; conveniémus íterum hebdómada próxima.