Hebdomada Papae, o Boletim de Notícias em latim

“HEBDOMADA PAPAE”

Notitiae Vaticanae Latine redditae

Die undetricésimo mensis Septembris anno bis millésimo undevicésimo

Papa de caeli statu ad Natiónes Unítas: «Date óperam cum probitáte, audácia et consciéntiae obligatióne»

Séssio Plenária Dicastérii pro Communicatióne: «Summa communicatio caritas est».

Francíscus Papa visitávit Albánum et communitátem Frusinátem «Novi Horizóntes».

Ómnibus vobis salútem ex corde dicit Eugénius Murrali: salvéte omnes, qui hanc novam editiónem audítis nuntiórum lingua latína prolatórum.

(Reportagens)

Die vicésimo tértio septémbris, per televisíficum nuntium Papa Franciscus adhortátus est partícipes Conferentiae Generalis anni bis millésimi undevicésimi de Agéndo pro Caeli Statu, ut eniteréntur in orbe salvándo: Conferéntiam, quae coróna fuit Conséssus Generális Natiónum Unitárum Novi Eboráci hábiti, participávit Secretárius Status Vaticáni Petrus Parolin. Evéntus refert Monia Parente:

Próbitas, audácia, consciéntiae obligátio: haec sunt verba praecípua – ad Papae senténtiam – quibus opórtet de immutatiónibus ad caeli statum attinéntibus ágere, ántequam sérius factum est. «Licet res bonae non sint et orbis ex hoc labóret, lumen tamen ad expediméntum patet adhuc. Adhuc. Áliquid témporis enim nobis súppetit adhuc. Ne sinámus ergo lumen illud defíciat» dixit Summus Póntifex et, appéllans Litteras Encyclicas Laudato si’, adiúnxit: «Probitáte, consciéntiae obligatióne et audácia nobis est adhibénda intellegéntia nostra, ‘ut insérviat alteríus géneris progressióni, sanióri, magis humánae, sociáli integraéque’, quae váleat oeconómiam ministráre humanae persónae, aedificáre pacem et ámbitum protégere»

Féria secúnda novíssima, Summus Póntifex convénit Superióres et Officiáles Dicastérii pro Communicatióne atque expósuit quae ei «cordi sunt quoad communicatiónem». Singulária refert Amadaéus Lomonaco:

Post salutatiónes quas Praeféctus Páulus Ruffini ad Papam réttulit, Summus Póntifex iniússis verbis grátias egit magnae famíliae, quae Dicastério Vaticáno dat óperam, enarravítque communicatiónem esse «non opus offícii, sicut esse possunt pública revocámina […] Communicáre seípsum revéra est de Substántia Dei súmere eiusdémque habére vultum; est in solitúdine haud residére; est necéssitas effundéndi quod hábeo et cógito esse verum, iustum, bonum et pulchrum». Communicátor authénticus seípsum omníno dat, seípsum omníno offert in communicándo, sibi non parcit. Summa autem communicátio – in promptu pósuit Francíscus – cáritas est. Atque adiécit: Unamquámque rem quam fácimus testimónio nostro subscríbimus. […] Hoc est adiúnctum martýrii nostrae vocatiónis: testes esse».

Superióribus diébus, Póntifex duas fecit visitatiónes insígnes: priórem apud communitátem Albanénsem in Látio, ubi recordátus est Ecclésiam locum esse occúrsus cum misericórdia Dei; álteram vero, ómnibus ínsciis, apud Arcem Caeli, quae dícitur, communitátis «Novi Horizóntes» Frusinátis: hic testimónia audívit iúvenum, qui servitútes suas superavérunt, ac Missam celebrávit cum sodálibus communitátis.

Papa Franciscus convénit in Vaticáno Cardinálem Reinhárdum Marx, Praésidem Episcopórum Germániae, et Cardinálem Marcum Ouellet, Praeféctum Congregatiónis pro Epíscopis, ad summas recenséndas quaestiónes próximae Sýnodi Ecclésiae in Germánia. Notória Conferéntiae Episcopórum Germániae diálogum hunc dixit «salutárem».

Haec ómnia sunt pro hac editióne. Grátias ágimus pro attentióne: íterum conveniémus hebdómada próxima.