O Boletim de Notícias em latim do Vatican News

“HEBDÓMADA PAPAE”

Notítiae Vaticánae Latíne rédditae

Die vicésimo quinto mensis Ianuárii anno bis millésimo vicésimo

(MANCHETES)

Hebdómada oratiónis pro Unitáte Christianórum, Póntifex ait: accéptio “virtus est oecuménica magni moménti”.

Subest Dies memóriae: Francíscus récipit societátem “Simon Wiesenthal” et confírmat reprobatiónem cuiúsvis antisemitísmi.

Papa lóquitur communitáti internationáli: éditur mónitum de pace in Líbya et núntius ad Davoniénsem oeconómicum Congréssum destinátur.

Salútem ex ánimo ómnibus vobis dicit Eugénius Murrali audiéntibus novos núntios latína língua prolátos.

(REPORTAGENS)

In audiéntia generáli feria quarta praetérita hábita, Papa Francíscus recordátus est Hebdómadae oratiónis pro Unitáte Christianórum ac palam expréssit acceptiónem “virtútem oecuménicam esse magni moménti”. Agit Amadéus Lomonaco:

In audiéntiae generális catechési Francíscus illum locum Áctuum Apostolórum indicávit, in quo narrántur naufrágium Melítae, summa Páuli fides in Iesu et accéptio prompta incolárum ínsulae, quod est signum Dei amóris. Haec enim accéptio, recordátus est Póntifex, est arguméntum eléctum a communitátibus Meliténsi et Gaulitána de Hebdómada oratiónis pro Unitáte Christianórum. Naufrágium Páuli illud nos monet quod hódie in mare évenit, cum disperátio indúcit nonnúllos ad tempestátes ac undas experiéndas, sed pro humanitáte hostílitas invenítur. Si veri in Christo fratres sumus, hospitálitas tum fit “oecuménica magni moménti virtus”, quae haud est “gestus magnanimitátis in unam partem convérsus; cum vero accípimus álios christiános, eos accípimus véluti donum quod nobis tribúitur”: hoc plánius dixit Francíscus.   

“Haud désino fírmiter condemnáre quamvis antisemitísmi spéciem”, ita ait Papa recípiens, occasióne Diéi memóriae, societátem “Simon Wiesenthal”, quae máxime contra aliárum stírpium ódium agit. Réfert nobis Emmanuéla Campanile:

Recípiens in audiéntia generáli sodáles institúti “Simon Wiesenthal”, Papa Francíscus memorávit diem liberatiónis castri carcerális nazistórum in Polónia, atque denuntiávit abséntiam verbórum prae “immoderatióne verbórum consumendórum” quia “siléntium est ad memóriam tutándam”; sine memória exstínguitur tempus futúrum. Papa strénue confirmávit condemnatiónem antisemitísmi ac “barbáricam huius renovatiónem” novíssimis tempóribus. Póntifex invitávit ad “proscindéndum solum ódii, pacem seréndo, cum redintegrántur ac sustentántur ii qui a vita sociáli excludúntur; exhortátus est deínde ut Christiáni et Hebrǽi una simul operéntur, “ad spátium fraternitátis colándum”.

(NEWS)

In fine oratiónis Mariánae, die domínico praetérito, Francíscus exoptávit ut bene céderet congréssus Berolinénsis de magno discrímine in Líbya, ex quo manifestátae sunt deliberatiónes quae invitárent partes líbycas ad ”bellum extinguéndum”. Sanctus Pater exhortátus est étiam ut iter suscipiátur ad ”solutiónem negotiálem” adhibendam.

Póntifex núntium misit occasióne quinquagésimi Davoniénsis oeconómici Congréssus, in Helvétia habiti, invítans ad individualísmum superándum atque ad offícium morále habéndum de mútua cura adhibénda, quia ”omnes sumus sodáles únicae famíliae humánae”.

Salutátio quaedam, auspícium et invitátio pronuntiántur ad orándum pro donis pacis, diálogi atque solidarietátis. Ita Papa in fine audiéntiae generális se convértit ”ad complúres viros mulierésque” qui in Extrémo Oriénte die vicésimo quinto mensis Ianuárii primum anni novi diem celebrábunt.

Haec ómnia sunt pro hac editióne. Gratias ágimus pro attentióne; conveniémus íterum hebdómada próxima.